Samad nga dili maalim

Pulos na mga tiguwang si Ponso ug Ulang, nga nagminyo, ning ilang dapit sa may bukiran Lintungaban, nga sakop ning ilang lungsod sa San Fernando.

“Makaya pa kaha nimo Ponso, nga sa akong tan-aw kanimo, nagkangukango ka na man lang intawon?” mao kini ang unang pulong nga nalitok ni Ulang sa unang gabii human sa ilang kasal.

“Subra pa sa makakaya akong darling nga Ulang, bisan tuod unaawop ang siga sa lamparilya.”

Tangkod pa lang gani sa usa ka semana sa ilang panagtipon, isip bana ug asawa, nagping-it na si Ulang sa iyang nawong. Ingon sa hapdos kuno paminawon.

“Maalim pa kaha kining dakong samad sa akong bilahan Ponso?” ni Ulang pa nga way hunong og tiyabaw sulod sa may sibay nga ilang gihigdaan.

“Patan-awa kuno ako Ulang?” maukiton nga nagpakisayod si Ponso, diin inanay niya kining giwiwi ... hangtud nga nagkanayon!

“Grabe man kining samara Ulang ug kinahanglan ato kining tambalan og hinawob nga udlot sa mayana!”

Wa mag-usik og panahon si Ponso. Gilugsong niya ang kabakiliron sa dalan sa Lintungaban. Gipangalap ang udlot sa mayana. Hapon na nga nalugsong si Ponso sa ilang pinuy-anan, diin naghuwat na kaniya si Ulang.

Tulo nalang ka semana ang milabay, wa gayoy alibyo sa samad ni Ulang, nga didto mahimutang ubos sa may bilahan.

Kanunay kining nag-agos ug nagduga. Halawom nga gabii kadto diin way hunong pagbunok ang makusog nga ulan, mao nalang ang namat-an ni Ponso nga hugot kaayo siya nga gigakos sa iyang asawa ug gihagkan sa tumang kahagkot.

“Bahala nalang sad Ponso ... kun dili motang-on ang kabasa ning samad sa akong bilahan!” nagkayuring ang sinultihan ni Ulang.

“Ikaw god darling kong Ulang ... basta mag-ampo kita nga maalim ra kanang samad sa ubos sa imong bilahan!” ni Ponso pa nga malaumon nga may kaalimaan pa ang samad sa iyang asawa. Hasta makapila mobalik sa pagtungas si Ponso sa bukiran sa Lintungaban, aron mangalap na usab og udlot sa mayana nga sarang iyang ikatambal sa iyang asawa ... apan sayang lang ang tanan ... kay kini kanunay naman lang nagbasa nga ingon sa nag-umido ang ilawom.

Nawad-an na og paglaum si Ponso, nga maalim pa ang samad ni Ulang ... hangtud nga sa matag gabii na lang iyang digamohon ang iyang asawa nga way tihiktihik.

Naglurat ang mata ni Ponso, sa dihang iyang namatikdan nga uga pa sa unas ang samad ni Ulang nga sa iyang tan-aw wa na ang inagos sa samad nga gituhoan niya nga dili na maalim. (Katapusan)