Anak - Gula 4

Gitugotan si Dorinda sa iyang inahan nga makigpanuroy kang Ben. “Sige day, ubani si sir Ben apan ayaw lang kaayo mo pagdugay’g uli.”

“Mosakay ka ba’g motor Dorin?” matud ni Ben dihang nakapahiluna na siya sa motorsiklo. “Motor man usab ang sakyanan sa akong boyfriend kaniadto Ben. Ayaw kahadlok kay bansay na ko nga mosakay’g motor,” matud ni Dorinda.

Misirit sila paingon sa iladong diskohan sa Salinas Drive. Mga alas 10 sa gabii na sila nga miabot. Daghan nang mga tawo sa disco pub, dunay mga Koreano ug Koreana nga customers.

“Moinom ka ba og beer Dorin?” gisukna sa reporter ang dalaga human sila makalingkod sa bakanteng lamesa. “Moinom man, pero dili lang kaayo daghan,” dali nga tubag ni Dorinda.

Miorder si Ben og ilang mainom. Midimdim usa sila og tag-tunga sa baso nga beer, dayon misayaw. Human sa mga dies minutos nga pagsayaw, namalik sila sa ilang lamesa.

Tungod sa kakusog sa tukar, dili kaayo sila magdungog nga magsultihanay samtang mag-atubang. Nahukman ni Ben nga motupad sa paglingkod ni Dorinda.

Kinahanglan g’yud nga ipaduol ang baba sa dunggan kun mosulti aron madungog tungod sa kakusog sa tukar. “Salamat kaayo nga wala nimo balibari ang akong pagdapit Dorin,” ni Ben pa.

Milingi si Dorinda kang Ben nga nag-smile. “Ako’y angay magpasalamat nimo kay gitabangan mo ako dihang wala g’yud ko’y kuwarta pagpatambal nako ni Inday.”

“Nganong nakahuna-huna ka man diay sa pagtabang nako adtong higayona Ben,” paapas nga pangutana ni Dorinda. “Naluoy ko kanimo nga nagtan-aw ug ilabi na g’yud sa imong anak.”

Wala motubag si Dorinda kang Ben. “Abi nimo, gusto baya g’yud unta ko nga mokontak nimo apan wala man diay ko makapangayo’g contact numbers nimo dihang nagkita ta sa ospital, ikaw ra man ang dunay numero nako. Maayo gani kay mikontak ka,” matud ni Ben.

“Gikontak g’yud tika Ben kay dili ko makalimot nimo sa imong kabuotan ngari nako,” mora’g naparaygon si Dorinda. Gihapuhap niya ang aping sa radio reporter. Midip-ig pa g’yud si Ben sa paglingkod kang Dorinda, iya kining giagbayan.

Gipunit ni Ben ang baso nga duna pay sulod nga beer ug iyang gitungab. Giinom usab ni Dorinda ang nahabilin niya nga beer. Giipisan ni Ben ang masi’g nila ka baso.

Nanayaw sila pag-usab. Sa ilang pagbalik paglingkod, gituyo ni Ben nga gipairag niya sa iyang dughan si Dorinda. Wala mopakita’g pagsupak ang dalaga. (Sumpayan)