Dili pa andam

Dear Tita Salie,

Have a wonderful day. Just call me Jay, 19 years of age ug nagtungha pa lang sa college. Dako kaayo ko’g problema, Tita, ug hinaot unta nga imo kong matabangan nga masulbad kini.

Aduna ko’y girlfriend nga sama usab nako nagtungha pa lang sa college ug 19 usab ang iyang panuigon karon. Taudtaod na mi sa among relasyon ug nagkahigugmaay gyod kaming duha. Kun wala gani kami klase magkita gyod mi ug mangaon samtang nag-estoryahanay.

Daghan na ang panahon nga tungod seguro sa among kabatan-on, wala namo mapugngi ang among kaugalingon ug among saw-an ang kalipay nga lawasnon. Sometimes, adto mi sa iyang boarding house, Tita, kay dili man siya taga dinhi sa Sugbo. Usahay kun duna mi kwarta mo-check in mi sa motel.

Tungod sa among ka-hot sa sex usahay dili namo mapugngan. Hinungdan nga namabdos gyod ang akong girlfriend. Dili pa kami andam sa umaabot namong life kay nag-eskuyla pa mi ug gusto pa namo makahuman sa among kurso. Wala pa ra ba masayod ang among parents sa nahitabo namo karon. Ang problema pa gyod kay masakiton ang parents sa akong gf. Unsay akong buhaton, Tita? Palihog pasabta ko. Daghang salamat. -- Jay

* * *

Dear Jay,

Kun sa una dili pa kamo andam, karon you have no choice but mangandam na gyud mo kay duna na moy umaabot nga anak. Inyong himuon ang inyong kaugalingon nga andam kay dili na nato puyde mabalik ang panahon. Inyo untang gihunahuna daan ang inyong gustong buhaton aron wala moy angayan basulan sa kauwahian.

Kun dili taga dinhi sa Sugbo ang imong uyab ug panagsa ra sila magkita sa iyang mga ginikanan seguro puyde pa nimong itago ang iyang kahimtang. Apan kun adlaw-adlaw mouli siya sa iyang mga ginikanan wala gyod mo’y choice kundili ang sultihan sila. Apan bisan pa man kun dili ninyo tug-anan ang iyang mga ginikanan moabot ra gihapon ang panahon nga ila kining mahibaw-an.

Bisan pa man sa nahitabo puyde gihapon mo nga mopadayon sa pagtungha hangtod nga makahuman mo sa inyong kurso. Puyde ninyong hangyoon ang inyong parents nga mopadayon ka sa imong pagtuon. Unya inighuman og panganak sa imong uyab motiwas usab siya pag-eskuyla. Depende kini sa desisyon sa inyong mga ginikanan. Apan kondili na mo paeskuylahon sa inyong parents kamo na ang mangita og paagi aron kamo makalampos sa inyong pagtuon. -- Tita Salie