Mata sa Kasingkasing - Gula 76

Kausa niana, mihangyo si Erik nga makigsulti kang Angeline. Tungod sa pagpamugos ni Erik misugot si Angeline. Didto sila mag-estorya sulod sa usa ka snack bar.

Nianang pagkaugma, sa pagsulod ni Angeline sa school campus, nakita niya si Almina nga ingon sa nag-atang kaniya. Misugat dayon kini kaniya sa pagkakita niini sa iyang pagsulod sa tulonghaan.

Ug nakugang si Angeline kay kalit man lang siyang gisagpa ni Almina.

Namula ang aping ni Angeline nga naigo sa kusog nga pagtamparos ni Almina kaniya. Mibati’g kasakit si Angeline sa gibuhat ni Almina.

Ang pagtamparos ni Almina kang Angeline nakadapit sa pagtagad sa mga estudyante nga nakasaksi sa nahitabo. Gitan-aw sila sa mga estudyante nga gustong manguryoso kanila.

“Unsa bay imong problema?” Gipangutana ni Angeline si Almina. “Unsa bay akong sala nga imo man dayon kung gisagpa?”

“Mangutana ka pag ngano?” Gitulisok siya ni Almina. “May nagsulti nako nga nagkuyog mo si Erik nga nangaon sa usa ka snack bar!”

“U-unsa?”

“Bigaon kang dako!” -- Sumpayan pa