Sa wala pa gani ang ikaduhang gubat sa kalibotan, dinha nay mga drama sa entablado nga gipasundayag sa kalungsoran. Dili kompleto ang pagsaulog sa pista sa lungsod o sa baryo kun walay drama nga ipasundayag.
Bisan wala pay mayk niadtong panahona, ang drama gipunsisokan sa mga tawo diin ang mga artista magsininggitay sa ilang mga dayalogo ibabaw sa bantawan nga petromax ray suga.
Dili lang drama nga sentimental, dinha say linambay kon panag-estopada sa mga sundang diin molutaw sa kaliyongan ang dula nga minoros.
Usa sa mga dramaturgo nga hanas kaayong moarte mao si Bar. Ambongan si Bar ug ulitawo pa sa edad nga 22. Daghan kaayo siya’g fans, usa na niini si Myla, nga sa hilom may gitagong pagbati ngadto kang Bar. Naibog siya sa ulitawo, ug kadtong pagbati nga naglumlom sa iyang dughan mianam pagbulto ug nagpangawhat sa katumanan.
Nangita si Myla og paagi nga magkasuod sila si Bar. Ug wa siya mapakyas sa iyang tinguha kay usa ka higayon niana, human sa pasundayag nga gipahigayon sa lungsod, sa pagkanaog gayod ni Bar sa entablado gisugat siya ni Myla ug gipahalipayan pinaagi sa pagpig-it sa mga kamot niini. Nabatyagan ni Bar ang dinagaang sa mga palad sa dalaga. Mipahiyom siya.
“Nindot kaayo nimong pagka dala ang imong parte Bar,” ni Myla pa nga nagpahiyom.
“Salamat sa imong pagdayeg, Myla,” mao ray natubag ni Bar.
“Bar, mahimo ba, magpahatod unta ko nimo sa balay,” paraygong hangyo ni Myla, ang iyang mga mata mora’g bato balani nagpangidlap sa tumang kamatintalon.
“Aw, o, way problema basta ikaw,” daling sanong ni Bar.
Mao kadtoy sinugdanan sa ilang panagsuod. Hangtod nga nagkasinabtanay gayod ang duha nila ka kasingkasing nga mihatod sa kaminyoon.
Karon, may anak na sila si Bar ug Myla. Nagpanuigon na kini og usa ka tuig. Buot ni Myla nga paundangon na niya si Bar sa pag-apil nianang mga drama. Kay ni Myla pa, kulang ra gani sa panigarilyo ang kitaon ni Bar nianang drama.
“Naunsa ka god, Myla, nganong pugngan ko nimo sa pag-apil sa drama nga nasayod ka na man nga ako ning talent, ang paglingaw sa mga tawo?” nataas ang tingog ni Bar nga mialkontra sa iyang asawa.
“Basta mao nay akong gusto. Puyo dinhi sa balay kay akoy buhi nimo,” ni Myla nga pinabundak ang tingog.
“Di na mahimo, Myla, duna pa mi pasundayag unya sa petsa 11 sa Marso atol sa pangilin ni Sr. San Bartolome.”
“Basta mao nay akong pagbuot. Kun magtuman ka sa imong gusto, ikaw lang...” mibahad si Myla, ug gibiyaan niya si Bar nga naghinuktok diha sa sala.
Walay nahimo si Bar gawas sa pagtuman sa kabubut-on sa iyang asawa. Ang iyang kahimtang walay kalainan sa manok nga gisulod sa tangkal, ug sa dihang gitrangkahan na mao pay pagpagawas ni Myla sa matuod niyang kinaiya.
Nagselos kaha si Myla kaniya? Nahiunlod si Bar sa lawom nga pagpalandong. (Katapusan)