Taas ang pagtan-aw ni Yuri sa mga babaye. Lahi siya sa ubang mga lalaki nga usa lang ka sex object ang pag-ila sa babaye. Alang kaniya, ang babaye usa ka katambayayong sa mga kalisdanan sa kinabuhi. Taas siya og respeto sa mga babaye ug wala siya’y gipili sa bulok sa ilang pagka-babaye. Si Yuri dili sama sa ubang mga lalaki nga magpatuyang lang og panguyab bisan og wala sila mahigugma sa babaye nga ilang gipangulitawhan.
Si Yuri dili gayod mangulitawo sa babaye nga wala niya higugmaa. Dili siya magmalipayon sa pagpakigrelasyon sa usa ka babaye nga dili maoy gipahinungdan sa pinitik sa iyang kasingkasing. Mao nga kun aduna na siya’y hinigugma, dili na gayod siya mangita og lain. Mahitabo lang nga maninguha siya’g laing babaye kun dili na sila magkasinabtanay sa iyang hinigugma o magkabulag sila.
Karon ingon sa gibati ni Yuri nga iya na gayod nga nakaplagan ang babaye nga alang kaniya. Iyang soul mate, matud pa. Kini iyang nakita diha sa pagka-babaye ni Salie.
Nakadayeg siya pag-ayo sa dalaga. Bisan og may pagka-estrikta kini apan iyang namatikdan nga may mga hiyas ang dalaga nga takos sa pagdalayeg sa usa ka lalaki. Nasabtan niya kun nganong init ang buot ni Salie ngadto sa mga lalaki. Tungod kini sa nahitabo sa iyang inahan ug igsuon. Dili niya mabasol ang dalaga kun nganong naingon kini niini.
Sa katibuk-an ni Salie nakita niya nga buotan kini. May prinsipyo ug maanindot og mga panglantaw sa kinabuhi. Kini ang matang sa babaye nga iyang gipangita. Ug karon nga iya na kining nakaplagan, dili siya makatugot nga mawala pa kini kaniya.
Apan nasubo si Yuri nga naghunahuna nga si Salie wala motuo sa iyang gisulti nga nahigugma siya niini. Nagtuo ang dalaga nga sama usab siya sa ubang mga lalaki nga mapahimuslanon sa kahuyang sa mga babaye. Unsaon niya pagpamatuod ngadto sa dalaga ang katim-os sa iyang katuyoan? Dili makita sa dalaga ang iyang kasingkasing aron unta mabasa ang ngalan niini nga nahikulit didto. -- Sumpayan pa