Anak - Gula 3

Nahukman ni Ben nga muadto sa balay nila ni Dorinda kay birthday sa iyang anak.

“Nahibalo ba ang imong bana nga giimbitar ko nimo Dorin?” giteksan ni Ben si Dorinda. Wala madugay, mi-reply si Dorinda. “Nagbuwag na mi uy, dugay na.”

Misagitsit lang ang motor sa radio reporter ug dali ra siya kaayo nga nahiabot sa balay nilang Dorinda didto sa Banawa. Gisugat si Ben ni Dorinda ug nasurpresa kaayo ang reporter sa kaanyag niini.

Wala g’yud masayop si Ben dihang una niya nga nakita si Dorinda didto sa ospital kay bisan og dili kaayo maayo ang sapot nga gisul-ob niini nabantayan niya ang talagsaong kaanyag. 

Diha pa nasuta ni Ben nga single parent diay si Dorinda kay wala man kini makasal ug sa amahan sa iyang anak.

“Bless ni Tito Ben,” miduol ang inahan ni Dorinda nga nagkugos og bata nga gwapa ug susama’g dagway ni Dorinda. “Siya ang bata nga imong gitabangan Ben. Tres-anyos na siya karon,” matud ni Dorinda.

Si Ben ra ang bisita nila ni Dorinda, gawas sa pipila nila ka paryente. Nagdungan sila pagpangaon. Gipaila-ila ni Dorinda ang radio reporter ngadto sa iyang mga paryente.

“Siya ang mitabang nako dihang naapike ko sa panggasto kadtong nahulog si Inday sa hagdan,” giingnan ni Dorinda ang iyang mga paryente.

Naangkon ni Ben ang pagdayeg gikan sa mga kabanay ni Dorinda, samot na sa inahan niini.

Nanglingkod sila si Ben ug Dorinda didto sa sopa. “Wala na ba g’yud mo magkita ug ang amahan sa bata?,” gisukna ni Ben si Dorin. Wala dayon motingog si Dorinda ug igo lang kini nga molingo-lingo.

Gisud-ong ni Ben si Dorinda. Bisan og duna kini anak apan lupig pa ang ubang dalaga sa iyang lawas. Igwad kaayo’g sampot, porma kaayo’g lawas ug lamorok og aping.

“Maayo kay wala ka makahuna-huna nga mangita’g lain Dorin?” giingnan ni Ben ang dalaga. “Kuyawan ko kay basin ang lalaki nga akong mapili dili gihapon nako ikasabot,” ni Dorinda.

Gilingi ni Ben ang nahimutangan sa inahan ni Dorinda. Tua ra kini sa layo nga dili makadungog kanila. “Nakailis ka na man g’yud Dorin, mag-disco ta ug manuroy,” tanyag ni Ben.

Nabantayan ni Ben nga mipahiyom si Dorin. “Sige, mananghid ko ni Nanay nga manuroy ta.” (Sumpayan)