Demolisyon

Gula 7

Igo g’yud nga nakasaka sa taas sa balay sila si Nikki ug Andro, mibunok ang kusog nga uwan. “Mikalit ra man pag-uwan uy. Pastilan ang ako intawon nga mga silingan nga tua ra manghigda sa karsada, nangabasa gyud ron,” giingnan ni Nikki si Andro.

Gitutokan ni Andro si Nikki. “Uy, nabasa man diay ka sa taligsik ganina, magkuha usa ko’g tualya para nimo Nikki.” Pagbalik ni Andro nga dala na ang tualya, gitrapohan niya ang bukton sa dalaga.

Takulahaw lang nga migunit si Nikki sa bukton ni Andro. “Salamat kaayo sa imong pagpakabana kanako Andro ha. Tinuod g’yud nga dali ka ra kaayo higugmaon. I love you.”

Grabeng kalipay ang gibati ni Andro. Gigakus niya si Nikki. “Kahayag usab sa suga uy, pagnga lang na Andro kay hayag bitaw ang suga sa poste,” matud sa dalaga. Gipawong dayon ni Andro ang suga.

Mikalit lang pagngiob ang sala sa balay. Milingkud pagbalik si Andro tupad sa dalaga nga karon paraygon na kaayo kaniya. “Andro, nagpasalamat ra usab ko sa Ginoo nga gidemolis ang among payag-payag daplin sa karsada kay nakaila ko ikaw.”

“Nagpasalamat usab ko sa Kahitas-an Nikki nga wala ko nimo pakyasa sa akong tinguha,” ni Andro pa nga migakus na usab sa dalaga. “Andro basin mamat-an ta sa imong Mama,” mabalak-on ang tingog ni Nikki.

Wala motubag si Andro ug sa una nga higayon gipatikan niya’g hawok ang mga ngabil sa dalaga. Nag-ukobay ang masi’g nila ka mga ngabil sa usa ka matam-isong pagminahalay.

“Mamat-an lagi ta sa imong Mama,” ni Nikki pa nga nagpanglingi sa pultahan sa kwarto sa Mama ni Andro.

Giukoban pag-usab ni Andro ang mga ngabil sa dalaga ug gihapohap ang iyang kalawasan. “Sige kay nabalaka ka man nga mamat-an sa akong Mama, dali adto ta sulod sa akong kwarto,” giingnan ni Andro si Nikki.

Wala motingog si Nikki apan mitindog siya dihang gibitad paghinay sa ulitawo ang iyang kamot ug nanulod sila sa kwarto. Nadungog nila ni Nikki ug Andro ang kusog nga pagbunok sa uwan sa gawas.

“I Love You Nikki.”… “Andro itugyan nako kanimo ang akong kaugmaon, ayaw ako pahilaka,” ni Nikki pa nga miparayeg sa ulitawo.

Nagkainit pag-ayo ang ilang pagparayganay ug gisaw-an nila ang gugma taliwala sa kusug nga pagbunok sa uwan. (Kataposan)