Mata sa Kasingkasing

Gula 72

“Dia na ang imong rasyon,” matud pa ni Vera.

“Unsa man na?” Pangutana ni Angeline.

“Unsa pa? Pagkaon. Gikan kini ni Robert.

“U-unsa?”

“Mao lagi. Hayahaya nimo, Day, uy. Daghan may nagmahal nimo.”

“Hain man si Robert?”

“Mipauli na. Igo lang siyang naghatod niining pagkaon para nimo.”

Wala motingog si Angeline. Sa hilom, natandog siya sa gipakitang pagpakabana ni Robert.

Pagkaugma, mibalik na ang pagkalagsik ni Angeline. Sayo siyang mibangon og naligo. Nagkantakanta siya samtang naghikay sa pamahaw nila ni Vera.

Sayong misulod si Angeline sa unibersidad nga iyang gitunghaan.

Miabot ang sportsfest sa unibersidad nga gitunghaan ni Angeline. Usa kini ka semana nga kalihokan diin ipahigayon ang nagkadaiyang paugnat sa kusog.

Si Angeline miapil sa dulang badminton. Si Vera lumba sa dagan ang giapilan. Samtang sila si Robert ug Erik miapil sa dulang basketbol. Managlahi ang team nila ni Robert ug Erik. -- Sumpayan pa