Demolisyon

Nag-atubang sila paglingkod si Andro ug Nikki sa gamay’ng lamesa. Mitutok si Nikki sa ulitawo nga daw dunay gibasa sa iyang panagway. Nagkatinutokay silang duha.

“Nalain diay ka ganina nga gibisitahan ko sa akong boyfriend? Taga asa diay ang imong girlfriend Andro?” duha ka nagpusot-pusot nga pangutana ni Nikki samtang nagpaabot sila sa ilang order nga pagkaon.

Wala dayon makatubag si Andro sa pangutana ni Nikki. Daw natuk-an siya nga naglisud sa pagtubag. “Bitaw wala ko makasabot sa akong gibati ganina. Mora ba og nagselos ko nimo. Bahin sa akong girlfriend, dugay na mi nga nagbuwag.”

Pabiling mitutok si Nikki kang Andro. Daw nabali ang sitwasyon kay inay si Nikki ang mobati og kauwaw, si Andro na hinoon nga usa ka lalaki ang gidaug ug daw dili makaharong pagtutok sa dalaga.

“Maayo kaha Andro nga akong buwagan si Jeffrey kay kuwang man siya og pagtagad nako. Ganina nangayo ko niya’g tabang pero didto ra g’yud siya sa iyang mga barkada nagkalingaw og kaligo sa dagat,” ni Nikki nga nangutana ni Andro.

“Nganong buwagan man nimo siya? Duna ba’y laing lalaki nga nanguyab nimo nga maoy ipuli nimo kang Jeffrey?” gisukna ni Andro ang dalaga. Milingo-lingo si Nikki ug mipahiyom.

“Wala may laing nag-court nako pero kun duna man gani nga makita nako nga mas pinangga ko niya kay kang Jeffrey, siya maoy tugyanan nako sa akong pagbati,” ni Nikki pa nga salabtonon kaayo ang gisulti.

Mitutok si Andro kang Nikki. Hinay-hinay nga misibog ang tuo niyang kamot ngadto sa kamot sa dalaga. Iya kining gihapuhap. Gipig-it ni Nikki ang kamot ni Andro ug salabtonon kaayo ang ilang masi’g ka tinan-awan.

“Nganong nakahuna-huna ka man sa pagtabang nako kaganina Andro?” gipangutana ni Nikki ang ulitawo.

 “Ambot bitaw, mora’g dunay nagtukmod nako nga pagbati nga tabangan ka. Nalooy ko dihang nakita ka ganina Nikki nga naghilak samtang nagtan-aw sa inyong balay nga giguba sa demolition team,” pasabot ni Andro ngadto sa dalaga.

Gisubli ni Nikki ang pagpasalamat kang Andro nga gitabangan siya pagpangita’g kapuy-an. “Kun wala ka pa motabang namo Andro, tingali tua mi karon mangatulog sa daplin sa karsada,” sa dalaga pa. “Salamat g’yud kaayo Andro. Ikaw ang lalaki nga dali ra kaayo higugmaon og babaye,” matud ni Nikki dungan sa pagpig-it sa palad ni Andro. Wala maglangan og higayon si Andro. “I love you Nikki.” (sumpayan)