Dili gusto motabang

Dear Tita Salie,

Maayong adlaw. Tagoa lang ko sa pangalan nga Ana. Dunay ka-live in nga ato lang tawgon sa pangalan nga Dodo.

Gikan gyod ko sa pobre kaayo nga pamilya. Wala gyod mi kaugalingon nga balay. Busa dihang nanguyab nako si Dodo ako gyod dayon siyang gisugot kay nagtuo gyod ko nga gumikan niya makatagamtam og kaharuhay ang akong mga ginikanan.

Apan nasayop diay ko sa akong pagtuo, Tita, kay si Dodo nga akong kapuyo dili gusto motabang sa akong ginikanan. Dili siya maluoy nga ang akong papa walay balay nga katulgan kun dili adto lang siya sa gawas sa balay sa among silingan, ug panagsa ra gyod siya mokaon diri sa amo kay maikog man siya ni Dodo kay bati man gyod kaayo og batasan.

Dako og sweldo ang akong kapuyo. Sa una iyang ihatag kanako ang tanan apan dihang iyang nasayran nga mohatag ko nilang papa nasuko siya kay kuno wala niya pamunita ang kwarta. Wala man gani kuno siya mohatag sa iyang ginikanan. Pero duna may income ang iyang pamilya matag-adlaw. Karon, hatagan na lang ko ni Dodo og igo lang pangkonsumo. Gusto unta ko motabang ni papa apan wala gyod koy ikatabang, Tita.

Taudtaod na man unta mi nagtipon 5 years ug 4 years old na ang among anak apan dili man gyod siya mobati og kaluoy sa akong papa. Wala pod ko mauyoni sa pamilya ni Dodo tungod kay pobre man kaayo ko. Unsa may akong buhaton, Tita? Palihog pasabta ko. Daghang salamat and God bless.

* * *

Maayong adlaw. Aduna gyo’y ubang tawo nga ingon niana ang kinaiya nga wala siya’y laing makita kun dili ang iya lamang kaugalingon, o ang iyang kaugalingong pamilya. Nga lisod na nila ang pag-abot sa ilang tabang ngadto sa uban. Ang uban naingon niini kay mao usab kini ang ilang nasinati sa ilang pamilya dihang mga bata pa kining mga tawhana, nga wala gyu’y nitabang kanila nga laing tawo sa ilang kalisod.

Mas maayo unta nga sa una, before ka nihatag og suporta sa imong papa imo unta siyang gihangyo nga kun puyde motabang ka og bisan gamay lang ngadto sa imong papa. Kay si Dodo man ang nangita og kuwarta dapat lang unta nga imo siyang gi-inform o gipahibalo sa imong buhaton, kay siyempre magdahom siya nga duna pay sobra ang inyong kuwarta apan wala na diay, tungod kay duna man kay gihatagan.

Isip magtiayon, magpahibaw-anay mong duha, magsultihanay mo mahitungod sa inyong problema kay bisan kun duna na moy kaugalingong pamilya apan dili mahimo nga atong talikdan ang atong mama ug papa.

Hinayhinaya lang siya paghangyo nga wala nay laing kapaingnan ang imong papa ug ipasabot nga isip anak imong responsibilidad ang pag-take care sa imong papa. Isulti kini niya sa hinay ug lambing nga paagi kanang bugnaw og ulo si Dodo. -- Tita Salie