Kontento ug mapasalamaton

Kasakit gyud. Diyos ko! Kaloy-i intawon ko. Ayaw nalang ko’g paantusa!” ni Doning Goc-ong samtang naglimbaglimbag sa iyang higdaanan sulod sa private ward sa Erlenmeyer Medical Center ning dakbayan. Naglabyoglabyog ang mga plastic nga gagmay’ng tubo nga gipangtakod sa iyang tuong kamot ug bukton. Lain pa ang gipangpapilit sa iyang dughan ug tiyan. Nangluspad si Doning samtang iyang kapikas nga si Maychel nakighinabi sa doktor.

“Dilikado iyang kahimtang. Lisod na siyang tabangon. Bisan matabang pa siya, dili siya mamatay, maparalisar siya. Kanang gitawag og vegetable,” matud ni Dr. Abet Yares nga nakighinabi ni Maychel sa lobby sa ospital gawas sa lawak.

Aron di kadungog si Doning. Apan dunay gikasabutan ang managtiayon nga kinahanglang masayud gyud si Doning sa iyang sakit. Kun matabang pa ba siya. Kay kun dili, di siya gustong mabuhi lang tungod sa mga artificial life support gikan sa modernong kahimanan sa ospital. Ang iyang gusto, kun maayo pa siya’s iyang sakit, kanang malingaw pa siya’s kinabuhi. Kun dili na gani, andam siya modawat sa kamatayon.

Usa ka civil engineer si Doning. Dunay construction firm nga dagha’g proyekto sa lainlaing mga siyudad sa Sugbo. Ikaduhang asawa niya si Maychel. Kay nabiyudo siya sa unang asawa nga si Delia Buaya. May tulo silang anak ni Delia. Sila si Elanor, Gingging ug Meme. Mga propesyonal ug minyo na silang tanan. Wa sila’y anak ni Maychel. Kay singkwenta nay edad ni Doning pagminyo nila. Unya si Maychel 35 na ang edad sa ilang pagkasal. Sobra bayente anyos na sila sa ilang kaminyoon nga puno sa kalipay. Tam-is kaayo ang ilang gugma kay wa sila’y anak, nitugot si Doning nga motabang si Maychel sa iyang pamilya.

Si Maychel ang nahimong kaabag ni Doning sa tanang negosyo nila. Naharuhay ang pamilya ni Maychel tungod sa panabang ni Doning. Gipaeskuyla ang mga manghod ni Maychel. Gipatukuran og balay ang mga ginikanan ni Maychel nga retirado nga magtutudlo sa saring publiko. Paggradwar og mga kurso sa mga manghod ni Maychel, gipatrabaho sa ilang negosyo.

Daghang disgrasya ang nahiaguman ni Doning sa batan-on pa. Kalima siya madisgrasya sa motorsiklo. Ug naoperahan siya sa tiil, tuhod ug abaga. Gipamutanga’g stainless. Nahulog pa siya sa balay sa iyang gitukod ug namatay og pila ka oras sa ospital. Swerteng natabang siya. Sa pag-edad niya’g 65, gikulbakulbaan siya. Kay iyang lolo Edwin amahan sa iyang papa, namatay sa sakit sa kasingkasing pag-abot og 65. Iyang papa Ritchie, namatay sa stroke pag-abot og 65. Siya, kay niabot na’g 71 ug tulo ka bulan gikan karon, ika-72 na niyang adlaw’ng natawhan, nakaingon nga ganansiya na iyang kinabuhi. Kontento na siya’ng mupanaw sa laing kalibutan kun di na gyud kapugngan.

Nitambong pa siya’g birthday party sa pag-umangkon ni Maychel sa niaging semana. Duna na siya’y infection sa iyang walang tiil. Nihubag iyang walang tiil ug nipula ang panit nga mora’g hamonada. Giagwanta lang niya. Kay di siya gustong mopalta sa selebrasyon ni Sheryl. Apan dangta’g lima ka adlaw nigrabe iyang infection. Nisaka ang kagaw ngadto sa iyang tiyan. Gi-admit nalang siya sa ospital.

“Tungod sa infection, ni-collapse iyang kidney ug na-rupture iyang aneurism tupad sa kidney. Nag-internal bleeding na siya. Ug mubo nalang panahon mo-shut down iyang lungs ug heart,” dugang ni Dr. Yares.

“Mopirma na lang ko’g waiver doc, nga kun mourong iyang kasingkasing, di na lang siya tabangon,” ni Maychel nga nisugod na’g bakho.

“Honey! I love you very much. I think this is goodbye” ni Maychel nga nagtibi ngadto’s iyang kapikas. Nihawok sa agtang, sa aping ug sa ngabil sa pasyente.

“I love you Maychel. You have been a wonderful wife to me. Thank you very much for your love and affection,” ni Doning nga nagkaanam na’g kalawom ang ginhawa. Giagwanta na lang ang kasakit sa lawas. Nihalok si Doning sa ngabil sa kapikas. Goodbye kiss niya.

“Salamat Diyos ko sa kinabuhi. Iuli ko kanimo akong kinabuhi. Ug nagpasalamat ako sa imong paghatag ug pagpahuwam niini,” ni Doning sa kusog nga tingog nga daw katapusang hunat na sa iyang kusog. Natandog si Dr. Yares sa kaligdong sa pasyente. Talagsaon iyang katakos. (Katapusan)