Man Hater

Gula 66

 “Anaa ka na usab niana,” gilabni ni Salie ang iyang kamot ug gisigahan niya sa iyang mga mata ang ulitawo. “Ayaw lagi paghisgot niana kay maglagot kong mamati.”

“I-I’m sorry,” ni Yuri. “Wa ko kapugngi ang akong kaugalingon.”

“Kun mahimo di na ta maghisgot niana. Nasayod ka na sa hinungdan di ko manarato. Busa ayaw pahimusli ang pagpakigsuod ko kanimo ug respetahi ang akong baroganan.”

Medyo napihaw ang nawong ni Yuri. Nasabtan niini nga ingon sa dili pa gayod maatraka ang dalaga. Init pa gihapon ang iyang buot ngadto sa mga lalaki.

Wala na magtingog si Salie. Gibugnaw niya ang iyang nagsurok nga dugo.

Taudtaod ang ilang kahilom. Nag-iyahay og paniid sa kaugalingon. Si Yuri nagbantay na sa iyang mga lihok ug sinultihan. Nahadlok siya nga makasala kang Salie.

Miabot ang ilang gi-order nga pagkaon. Mitangka dayon sila kay mibati na og kagutom si Yuri. Lima ka potahe ang ilang sud-an. Bisan ginagmay lang ang gikuha ni Salie sa sud-an apan nabusog gayod siya niini.

“May appointment ka pa ba human niini?” nangutana ang ulitawo nga nagpanug-ab sa kabusog.

“Wa na,” mubong tubag sa dalaga. “Apan nakahunahuna ko nga maglibotlibot una sa siyudad. Basin may makuha akong maanindot nga balita.”

Mitan-aw si Yuri kaniya. Unya miyangoyango kini.

Mikalit si Salie paghupo sa lingkoranan dihang iyang nakita si Allan nga misulod sa kan-anan. Mora’g aduna kini gipangita. Gisuhid niini ang mga nawong sa mga kustomer nga nangaon. Nagpagamaygamay og maayo ang dalaga sa iyang gilingkoran ilabi na kay naatbang siya kang Allan. Nagpasalamt siya sa hilom nga daghang kostumer ang nangaon mao nga wala siya makita ni Allan.

“Salie, ngano?” nahibulong si Yuri nga nakamatikod kaniya. Milingilingi ang ulitawo. -- Sumpayan

 pa