Mata sa Kasingkasing
Gula 68
Gipadagan dayon ni Erik ang sakyanan dihang nakapahimutang na sila sa sulod. Wala dangti’g dugay, namatikdan ni Angeline nga dili paingon sa iyang boarding house ang dalan nga ilang gisubay.
“A-asa ko nimo dad-a?” Nakapangutana si Angeline nga mibati’g kabalisa.
“Masayran mo ra unya kun atua na kita didto,” maoy tubag ni Erik. “Ayaw kabalaka. Wa ko’y dautang tuyo nimo. Human sa atong panagsulti, ihatod ko ikaw sa imong gipuy-an.”
Wala na motingog si Angeline.
Paglabay sa pipila ka gutlo nga pagdagan sa sakyanan, nahiabot sila sa Food Park sa dakbayan sa Tagbilaran. Gipahunong ni Erik ang sakyanan.
“Manihapon una ta,” nagkanayon si Erik. “Nasayod kong wa ka pay panihapon.”
Wala na lang mo-ik si Angeline.
Nanganaog sila sa sakyanan ug misulod sa usa ka barbeque stall.Nangaon sila. Pagkahuman, gidala si Angeline ni Erik ngadto sa plasa.”
“Nagkasuod na gyud diay mo’g maayo si Robert, no?” si Erik ang mibukas sa ilang panagsulti.
“Di man tingali daotan kun makigsuod ko niya?” Sikmat ni Angeline. -- Sumpayan pa
- Latest
- Trending
