Gi'utol

Upat na ka adlaw nga wala makakalibang si Ramon. Dili niya mahimong pugson ang pagpagula sa iyang hugaw. Gidid-an siya sa pag-utong og dugay tungod sa iyang sakit nga high blood. Iyang namatikdan nga hagubhob na ang tingog sa iyang tiyan kun pikpikon. Aslum na ang hangin nga mogula sa iyang pagpanug-ab. Nabalaka na siya nga tingali’g magdulot kini og komplikado nga kadaut sa iyang panglawas kun iya kining pasagdan.

Nianang pagkaudto, miadto si Ramon sa Maayo Clinic, Tabunok. Gisugid niya sa doktor ang iyang kabalaka ug pagduda.

“Daghan kaayo ang akong nakaon Dok; mga hinog nga bayabas nga dala sa akong asawa gikan sa bukiran sa Gindarun. Gaduda ko nga maoy hinungdan nga wala pa gyud ko makalibang hangtod karon, upat na ka adlaw sukad sa akong pagkaon sa bayabas.”

Mipahiyom lang ang doktor nga naminaw. Mapasaligon nga miingon: “Dili angay nga kabalak-an ang anaa sa imong hunahuna. Komon kaayo ang maong sintomas, sa mga tawo nga makakaon og daghang bayabas. Ang mga liso sa bayabas nahimong gahi’ng tubol nga mibabag sa agianan sa imong hugaw. Gi-utol ka. Atong pahumokon ang kagahi sa tubol pinaagi sa supositori, ang tambal nga makapahumok niini. Paghubo, higda sa kama nga pa-ubo kay akong ipasulod ang supositori sa imong lubot, aron mahanaw na sa imong hunahuna ang kabalaka nga naghasol kanimo.”

Gibati’g kagilok ug kagil-as si Ramon sa gibuhat sa doktor kaniya.

Human sa gibuhat sa doktor kaniya, iya kining gipangutana. “Makakalibang na kaha ko Dok?”

“Oo naman. Ordinaryo lang ang imong kaso. Ayaw kahadlok. Walay namatay sa utol. Dad-a hinuon ning usa pa ka supositori ug ibutang sa pabugnawanan aron magpabili’ng gahi. Karong gabii, kun dili ka bation og kalibangon, sugoa ang imong asawa sa pagpasulod niini sa imong lubot,” sa doktor nga mapahiyumon.

Miabot ang kagabhion. Wala gihapon batia si Ramon ug kalibangon. Gitawag niya si Linda, iyang asawa.

“Mommy, ipasulod ra ning supositori sa akong lubot.”

“Oo, Dad, hugasan ko usa og alkohol ang akong kamot.”

“Sige na Dad, huboa na ang imong brip.”

“Tuwad na Dad, kay akong ipasulod ang supositori.”

“Giwiwi ni Linda ang lubot sa walang kamot ug gipasulod ang supositori pinaagi sa tuong kamot. Napasulod ni Linda ang tambal nga wala abti og usa ka minuto, buhat nga nakapahibulong pag-ayo ni Ramon.

Gipangilogan ug gihilasan siya nga nahinumdom sa gibuhat sa doktor kaniya ganinang udto. Gigunitan ang iyang abaga sa duha ka kamot niini. Gipasulod ang supositori pinaagi sa nagtuskig nga pikoy. Tungod sa utol napahimuslan ang iyang pagkalalaki. (Kataposan)