Demolisyon

Naikag si Andro pagpahunong sa iyang motorsiklo aron obserbahan ang nagkaguliyang nga demolition sa kabalayan sa usa ka bahin dinhi sa dakbayan sa Sugbo.

Samtang ang mga sakop sa demolition team nga gipangulohan ni Noel Artes padayong nangguba sa kabalayan nga apektado sa road widening project sa kagamhanan, diha usab ang kapolisan nga mihatag kanila og proteksyon.

Nabantayan ni Andro nga dunay mga tag-iya sa kabalayan nga maisugong misinggit og sakit nga mga pulong ngadto sa demolition team, apan daghan usab ang igo lang sa pagpaagas sa ilang mga luha. Nasigpatan ni Andro ang usa ka babaye nga nagbakho kilid sa karsada samtang nagsud-ong sa usa ka balay nga gisigihan og guba sa mga sakop sa demolition team.

Sa hilom gibati si Andro og kalooy ngadto sa babaye nga sigurado siya nga usa ka tinun-an sa University of Cebu tungod sa iyang gisul-ob nga uniporme. Gipadagan ni Andro ang iyang motor duol sa babaye.

Nahuna-hunaan ni Andro nga magpakisayod siya sa maong babaye kabahin sa demolition.

“Mihangyo man unta mi nga hatagan nila’g higayon nga makapangita og kabalhinan apan wala g’yud sila mopatoo. Luoy kaayo ang among balay nga gigugba na nila... wala na mi kapuy-an,” sa babaye pa nga nagbakho.

Daw gibati usab ni Andro ang kagul-anan nga natagamtaman sa babaye. “Ako diay si Andro... sagdi lang, mopauli ko sa balay karon dayon ug hangyoon ko si Mama nga kamo maoy papuy-on sa silong sa among balay kay wala na man ang nag-abang,” ni Andro pa nga daw misimpatiya sa kahimtang sa dalaga.

 “Salamat kaayo Andro ha nga mibati ka sa among kahimtang,” matud sa dalaga nga daw migaan-gaan ang gibati nga kasubo. “Nikki diay ang akong ngalan Andro.”

Wala na modayon sa pagtrabaho si Andro. Gusto niya nga matabangan si Nikki nga makakita og kapuy-an ang iyang pamilya. Iyang nasayran nga patay na ang amahan ni Nikki ug ang inahan na lang niini maoy nagbuhi pinaagi sa pagpaninda.

Paglabay sa usa ka oras, mibalik na si Andro sa dapit nga gihimoan sa demolition. Didto pa gihapon si Nikki nga naghipos sa ilang kagamitan uban sa iyang inahan nga subo kaayo og panagway.

“Nikki... dia na ko. Misugot ang akong inahan nga kamo maoy mopuyo sa silong sa among balay nga gibiyaan na sa nag-abang. Duol ra man dinhi ang barangay T. Padilla,” ni Andro pa nga nagngisi. (Sumpayan)