Anak sa 'Ungo'

Gula 7

Naghinuktok si Kenn nga nagsud-ong sa mga langgam uwak nga diha sa dagko kaayong mga tangkal. Gitagsa-tagsa niya kini sa pagbanwag ginamit sa iyang flashlight.

“Mao diay nga gikatahapan kamo nga ungo Tin kay kanunay man sila nga makadungog nga dunay magtingog nga mora’g wakwak dinhi sa inyo,” matud ni Kenn. Igo lang miyango-yango si Tina. Naigking si Kenn dihang may mihikap sa iyang abaga. “Gitan-aw diay nimo ang akong binuhing mga uwak Dong Kenn?” si Valentin maoy nakita ni Kenn sa iyang paglingi.

“Nahadlok man gud si Kenn kaganina Pa pagkadungog nga dunay tingog nga mora’g wakwak nga dia g’yud luyo sa atong balay. Ako siya nga gidala diri aron dili siya apil nga magtoo nga kita mga ungo,” matud ni Tina.

Nanaka sila sa balay ug didto motiwas sa pagsultihanay. “Nalipay kami Kenn nga mianhi ka gayud sa among balay niining gabhiona ug wala mahadlok bisan og gidungog nga kami mga ungo,” ni Valentin pa nga nagngisi.

“Lauman namo Dong Kenn nga makatabang ka sa pagpahigmata sa katawhan dinhi sa among dapit nga daw nabutaan sa ilang sayop nga pagtoo nga kami mga pamilya sa ungo,” mitimang si Nang Trining nga inahan ni Tina.

“Aw Oo, sure, sure, ako maoy mopahigmata kanila nga sayop sila sa ilang pagtoo. Labaw na sila nga makalitan nong Val, nang Trining kun pahibaw-on nako sila nga magpakasal kami si Tina,” giingnan ni Kenn ang mga ginikanan sa dalaga.

“Unsa!!! Kay ngano nagkasinabtanay ba diay dayon kamo Dong sa amo lang pagbiya sulod sa pipila ka oras?” hapit magkadungan sa pagpangutana ang mga ginikanan sa dalaga ngadto kang Kenn.

Gikuha ni Kenn ang tuo nga kamot nila ni Val ug Trining ug mi-amen siya agi og pagtahod sa umaabot niyang mga ginikanan.

“Inig-uli nako sa siyudad Nong Val, Nang Carmen, akong kuhaon ang akong Mama ug Papa aron sabotan dayon ang among kasal ni Tina,” matud ni Kenn.

Wala makapugong si Tina sa iyang kalipay sa nadungog niya gikan kang Kenn ug gigakus niya ang hinigugma. Kamaya ang mihari sa panimalay sa giingong mga ungo.

“Sige gabii na dong Kenn, dinhi na lang katulog sa balay ug kay minyoan man g’yud kaha nimo si Tina, pag-uban na lang kamo pagkatulog diha sa iyang kwarto. Ayaw na lang pauli kay masugatan pa unya nimo ang ungo,” ni Valentin pa nga mipikpik sa abaga ni Kenn ug nagngisi. (Kataposan)