Anak sa 'Ungo'

Gula 6

Padayon nga nagginaksanay ug nag-ukobay ang masig ka mga ngabil nila ni Kenn ug Tina. “Pwede ba og adto ta sa imong kwarto?” giingnan ni Kenn ang hinigugma kay nabalaka siya nga may makakita kanila.

“Tana,” mitindog ang dalaga ug gigunitan niya ang kamot ni Kenn. Didto sa sulod sa kwarto gipadayon nila ang mainiton nga pagparayganay, hangtud nga gianod sila sa makusog nga sulog sa tagsa-tagsa nila ka pagbati.

Nasayran ni Kenn nga wala pa g’yud mahilabti og lalaki si Tina. “Abi nimo Kenn, ikaw pa g’yud ang nahimo ko nga boyfriend. Ikaw pa g’yud ang nakauna nako,” giingnan ni Tina si Kenn.

“Magpasalamat ko nga sa pag-anhi nako sa probinsya, nakaila ko ikaw Tin kay sa una ko lang pagkakita kanimo ganina, mibati dayon ko og talagsaong pagbati,” matud ni Kenn.

Nahitabo pa gayud ang laing hugna sa ilang pagparayganay. “Wak! Wak! Wak!,” nahaigking na usab si Kenn sa nadungog niya nga tingog sa nagwakwak nga gikan sa duol nga dakung kahoy.

Mag-ilis na ta Tin kay basin maabtan kita sa imong Papa ug Mama. “Mahadlok ka ba diay nga maabtan ta dinhi?” gisukna ni Tina ang iyang boyfriend nga taga siyudad.

“Basin unya og masuko sila og unsa unya’y buhaton nila kanako,” matud ni Kenn sa tingog nga maguwang lang sa hagawhaw. Dali ra sila nga nakasul-ob pagbalik sa ilang sapot ug namalik sa kayda sa balay.

Gitan-aw ni Kenn ang iyang relo. Nakita niya nga hapit na motunga’ng gabii. Gigakus siya ni Tina ug wala tuyoa nga nahikapan sa dalaga ang iyang kalibre 45 nga pistola nga giluklok sa hawak.

“Hala may armas ka diay? Polis ka Kenn?” gipangutana siya sa dalaga. Dali kaayo nga nakapamalibad si Kenn apan iyang gitug-anan ang dalaga nga lisensyado ang iyang armas.

Nakahuna-huna si Kenn nga mangutana kun nganong nadudahan si Tina nga pamilya sa mga ungo. “Tungod kana kay hilig kaayo si Papa Valentin nga mogalam og mga langgam,” mubo nga tubag ni Tina.

Giagni ni Tina si Kenn nga manaug sila sa balay. “Dali bitbita kanang imong flashlight,” matud ni Tina nga miuna sa pagkanaug gikan sa kayda. Misunod si Kenn sa dalaga.

“Banwagi kanang tangkal sa luyo sa balay,” giingnan ni Tina si Kenn. Napasiga ang mga mata ni Kenn tungod kay nakita niya ang daghan kaayong mga langgam nga itum.

“Mga uwak na Kenn nga gibuhi ni Papa ug kun anad na ang mga langgam iyang buhian ug anha na sila mopuyo diha sa dakung kahoy,” matud ni Tina. (Sumpayan)