Gula 60
Wala dayon makatubag si Salie. Mao pa siya mahinumdom nga wala diay niya madala ang brown envelope. Nahibilin kini didto sa awto-kay ang tanan nga iyang gigambalay kaganina sa nagpaingon pa siya sa buhatan sa kapolisan gisakmit sa kalimot ug kakulba sa paghunahuna sa ilang panagkita ni Inspector Cuyos.
Mitindog si Salie ug nananghid kang Yuri nga iyang kuhaon ang envelope didto sa awto. Misunod usab pagtindog si Yuri.
“Maayo tingali nga sa gawas na lang kita magsulti,” matud ni Yuri nga mitan-aw sa relo nga diha sa iyang bukton. “Mangaon na lang hinuon kita sa paniudto. Hapit na man ang tingpaniudto.”
“Ikaw ang mag-igo,” sa dalaga pa.
Nagkuyog sila paggawas sa kuwartel. Nag-ampad sila’g panlakaw subay sa sementadong pasilyo. Gisundan sila’g tan-aw sa mga polis nga mga sakop ni Chief Inspector Cuyos. Ang uban nagkinidhatay. Si Yuri ingon sa mapagarbohon kaayo nga gikauban niya ang dalaga.
Miluwan gilayon sila sa sakyanan ni Salie nga nag-urong didto sa gawas. Gimaneho ni Salie ang kaugalingong kotse. Sa nagdagan na ang sakyanan, dihadiha gitunol niya ang brown envelop ngadto kang Yuri.
Gihiling gilayon ang envelope sa batan-ong polis. Gikuha ang papel nga gipataptan sa tinabas-tabas nga mga letra ug gibasa ang mga pulong nga namugna niini. Mikunot ang agtang sa ulitawo sa iyang nabasa.
“Kinsay naghatag niini kanimo?” giuli ni Yuri ang mga papel ngadto sa gisudlan nga envelope.
“Usa ka bata ang nagtunol niana kang Vilma, akong kauban sa trabaho,” ni Salie. “Gipahatag kana kanako ug wala magsulti’g kinsay nagsugo niya. Nagtuo ako nga gikan kana sa misteryosong tawo — kadtong nanawag kanako sa telepono.”
“Unsa may gipasikaran mo sa maong pagtuo?” ni Yuri nga mitan-aw kang Salie. -- Sumpayan pa