Nausab nga paghulagway

Pag-abot ni Ramon sa balay gikan sa call center nga iyang gitrabahoan, iya dayong giatubang ang dakung salamin diha sa iyang lawak. Midiyong ang mga mata ug naglingolingo nga mitutok sa iyang pamayhon. Nawala na ang kamaskulado sa iyang dughan ug bukton. Mihugo siya pag-ayo. Lahi na kaayo ang iyang pamayhon kun kini itandi sa nangaging mga tuig nga milabay.

Ikaduha na ka tuig niya karon nga panarbaho sa call center. Daghan na siya og gipamati nga dili maayo sa iyang lawas. Ang kanunay niyang panggabii nga trabaho nakapawala sa iyang gana sa kaon. Dili hingpit ang iyang kinatulgan maadlaw. Mohanap usahay ang iyang mata sa sige og tutok sa computer.

Kanunay’ng manakit ang bukobuko ug liog. Tungod na sa kadaghan sa iyang gimulo, nakahukom siya nga moundang na lang sa iyang trabaho. Labot pa usab, dili kini ang klase sa trabaho nga iyang gitun-an sa eskuylahan. Gianugonan siya sa iyang lisensya sa pagka-nars nga wala magamit tungod kay walay hospital nga kasudlan.

Apan bisan pa niini, wala siya kawad-i og paglaum nga makakita og trabaho nga haum sa iyang propesyon. Tungod sa kadaghan sa iyang gihunahuna ug kaduka gikan sa trabahoan nakatulog dayon siya.

Nakamata si Ramon sa kiring sa iyang cell phone. Long distance call gikan sa iyang Tiya Alice nga nars nga dugay nang nagtrabaho sa usa ka dakung hospital sa Australia:

“Maayong buntag! Si Tiya Alice ni nimo Mon! Komusta ka na? Aduna koy balita alang kanimo. Tingali dili mo kini tagaan og gibug-aton. Nasayud ko nga wala kay gusto niining klaseha sa trabaho. Apan gipahibalo ko lang kini kanimo, pamasin nga mausab ang imong hunahuna kun imong masayran nga hasta kapila pilo-piloa ang imong sweldo diha sa call center. Ang embalsamador sa among hospital edaran na ug moundang sa iyang trabaho sunod tuig. Ang hospital nagplano nga mokuha og tawo gikan sa Pilipinas aron ipuli sa iyang katungdanan. Ako kang girekomendar sa direktor sa hayaan sa mga patay sa maong hospital. Siya ang mangunay sa pakigkita kanimo. Kinahanglan nga may ikapakita ka nga katakus sa mga buluhaton sa usa ka embalsamador. Paninguhaa nga makasulod ka og trabaho sa punerarya aron mabansay ka sa maong mga buluhaton. Ang imong pagka-nars ug duha ka tuig sa call center makatabang og dako aron ka makakuha og lisensya sa pagka embalsamador gikan sa Department of Health sa Pilipinas ug sa Australia.”

“Daghang salamat Tiya sa iyang kasayuran.”

Gituki ug gitimbangtimbang pag-ayo ni Ramon ang kasayuran nga gipadangat sa iyang iyaan. Ang maong kasayuran nakapausab sa iyang paghulagway sa usa ka embalsamador. Kinahanglan dili palabyon ang maong kahigayonan. Kini na ang katumanan sa iyang pangandoy nga makapanarbaho sa gawas sa paabuton puhon. Dili lang siya makadawat og dakong suhol kundili hasta usab ang pagbalik sa kabaskug sa iyang maayong panglawas. Ang usa ka tuig nga gidugayon dili dugay nga paabuton.

Sa tumang kadasig, naligo, nag-ilis, namahaw dayon si Ramon aron adtuon ang San Isidro Funeral Homes Inc., nga naghulat lang sa iyang pagduol. Iyang dawaton ang dugay nang gitanyag kaniya nga mahimong usa sa mga embalsamador sa maong punerarya. Nausab na sa hingpit ang iyang paghulagway sa usa ka embalsamador. (Katapusan)