Mata sa Kasingkasing

Gula 61

Tingali wala motuo si Robert sa iyang gisulti maong nakigkomprontasyon gayod kini kang Erik.

Misantop sa hunahuna ni Angeline nga posibleng nasayod na si Erik nga nangulitawo si Robert kaniya. Hayan gisultihan na ni Robert si Erik mahitungod sa pagpanguyab niini kaniya.

Hugot ang pagtuo ni Angeline nga siya gayod ang gipanagsultihan nila ni Erik ug Robert. Ang iyang gikabalak-an mao nga basin og dili magkasinabot ang duha. Si Robert ra ba seloso nga wala sa hustong lugar.

Sa laing bahin hinuon, nareyalisar ni Angeline nga angay niyang ikalipay kun nasayod na si Erik bahin sa pagpangulitawo ni Robert kaniya. Bisan og wala niya sugta si Robert pero kun nasayod na si Erik sa pagpanguyab niini kaniya, gusto niyang makita ang reaksiyon sa ulitawo.

Gusto niyang masuya si Erik bisan dili niya uyab si Robert. Sa ingon, makabalos siya’g gamay kang Erik tungod sa pagpakigsuod niini kang Almina -- kun dili man tinuod nga may relasyon sila!

Gisakitan man gud si Angeline nga wala gayod magtagad si Erik sa iyang gibati ngadto niini. -- Sumpayan pa