Anak sa "ungo"

Taga siyudad si Kenn ug mibisita ra siya sa iyang apohan nga nagpuyo sa barangay Anonang Norte nga sakop sa dakbayan sa Bogo.

Nagpauban siya sa iyang mga ig-agaw pagpangayam sa banika dala ang iyang air rifle. Nasigpatan dayon ni Kenn ang dakung langgam-itum nga mitugdon sa kahoy’ng tugas.

Gihup-an dayon niya hangtud nga napahimutang niya ang iyang kaugalingon sa bantang nga dapit. Gitirahan dayon ni Kenn ang langgam.

Misukarap ang langgam apan nakamaneho pa kini sa paglupad bisan og nagtakilid. Sa iyang bana-bana kabahin ra sa pako ang iyang naigo.

Gilantaw sa mag-agaw ang langgam hangtud nga mitugpa kini sa labong kaayo nga kahoy’ng dakit duol sa usa ka payag. “Tana gaw atong gukdon,” ni Kenn pa nga midagan dayon.

“Ayaw usa gaw! Gaw balik usa diri,” singgit duha ka ig-agaw ni Kenn nga sila si Julian ug Macario. Tulin kaayo nga midagan si Kenn paingon niadtong labong nga kahoy.

Naghangad-hangad si Kenn sa kahoy nga nagbitbit gihapon sa iyang pusil de-bomba. Sa unahan, nakita niya sa payag nga adunay usa ka babaye nga naglingkod sa lantay nga nagpilit sa punoan sa kahoy. “Day, wala ka makakita niadtong itum nga langgam nga mitugpa dinhi sa kahoy?” gipangutana ni Kenn ang babaye, apan igo lang milingo-lingo.

Taud-taud, miabot ang duha ka ig-agaw ni Kenn. “Gaw, ayaw na paniro dinhi kay peligro na kining dapita,” matud ni Julian. Nahibulong kaayo si Kenn sa gisulti sa iyang ig-agaw.

Nabantayan niya nga daw may gikahadlokan ang iyang mga ig-agaw sa maong dapit. Misamot ang iyang kalibog kay nagdungan nga mipalayo ang iyang mga ig-agaw.

Nakita ni Kenn nga dunay lalaki nga tag-as og buhok nga nagpaingon sa iyang nahimutangan gikan sa payag sa unahan. “Unsay imong gipangita Undo?” nangutana kaniya ang guwangong lalaki.

Iyang gitug-anan nga nangita siya sa langgam-itum nga napusilan niya didto sa pikas bungtod. “Kun mao kana, ayaw na siya’g hilabti. Ang binuhi tingali nako nga langgam ang imong napusilan,” matud sa guwangon nga lalaki.

“Tawga lang ko og Valentin Dong ug dapiton ko ikaw sa akong payag kay pasabton ko ikaw nganong dili nako gusto nga may mapusil dinhing dapita,” mipahiyom ang lalaki kang Kenn.

Wala niya kawanga ang pagdapit kaniya. “Gaw! Gaw! Dali na!” nadungog niya ang tingog ni Julian nga nagsangpit kaniya. Diha pa masayri ni Kenn nga gwapa diay ang babaye nga iyang gipangutana ganina kun nakakita ba sa langgam-itum. (Sumpayan)