Valentine aftershock

Unsa na man? Ako tikaw’ng pangutan-on sa ikatulong higayon. Kun mopadayon ba gyud ka’g kiha og adulteryo batok sa imong asawa ug sa iyang paris sa pakighilawas sa inyo niadtong Valentine’s Day? sukot ni Prosecutor Edwin Maningo ngadto ni Doning Goc-ong. Nia ron sila ning sayong kahaponon sulod sa opisina sa fiscal/prosecutor nga naghimog preliminary investigation mahitungod sa kaso.

Niadtong nilabay’ng Valentine’s Day nasakpan ni Doning sa akto iyang kapikas nga si Maychel nga nakighilawas sulod sa ilang balay mismo ni Ritchie Tibon ilang silingan sa baryo Pachacuti ning dakbayan. “Kay kining kasong adulteryo o adultery ang bana lang ini ang makakiha. Kun dili mokiha ang bana, dili manginlabot ang gobyerno. Kay gitawag kini’g private offense,” ni Edwin. Gitutukan niya tagsatagsa ang tulo sa iyang atubangan. Taxi driver si Doning. Unya tungod sa iyang paningkamot nga dako’g kita kay naa nas kolehiyo ilang bugtong anak nga si Delia, way palta sa pagkayod og pamasahero. Nasayod siya nga sa Valentine’s Day kusog ang sakay. Kay kusog ang check-in sa mga motel ug hotel. Nakalimtan niya kadiyot ang iyang kapikas. Si Maychel bisan og 35 anyos na, mamords pa baya.

Apan nianang alas sayis sa hapon nakahunahuna si Doning nga surprisahon niya iyang kapikas og pauli. Mag-Valentine’s Dinner sila sa ila. Nipalit siya’g birthday pansit ug slice bread. Ug nipauli. Unsa bang sa paghimuntog niya’s ilang pantawan, nag-uyog man ilang balay. “May aftershock pa man seguro!” tuaw niya sa hilom. Apan nakadungog siya’g hinangos ug inagulo sulod sa ilang lawak bana’g-asawa. Nisirit nalang siya sa estasyon sa polis. Nagpakuyog siya’g pulis balik sa ilang balay. Naabtan gyud nila ang duha sa kinapungkayan sa himaya. Nagbalhog sa bilanggoan si Maychel ug Ritchie sa gabii sa himaya. Ulitawo si Ritchie ug tall, dark and handsome nga kaibgan sab gyud. Samtang si Doning moboon nga mobo pas iyang asawa. “Kun nindot imong duwaan ug wa na nimo dulai, may maibog gyung modula niini. Kun lami imong sud-an. Unya imong pasagdahan sa lamesa nga way tabon, sungkabon gyud og iring” pasumbingay sa prosecutor. Nipasiklap ni Maychel nga nagminghoy. Daw nagpakilooy sa iyang bana pinaagi sa iyang tinan-awan. Nagduko lang si Ritchie.

Daw mabasol sab si Doning sa panginahanglan sa iyang asawa. Kay kadaghan na siya paraygi niini. Apan tungod sa iyang kalapoy sa trabaho, motakilid lang siya ug dayong hagok. Nakalugar iyang asawa ug kabit sa Valentine’s Day kay wala siya ug si Delia.

“Hunahunaa pag-ayo Mr. Goc-ong. Kay karon na ang adlaw sa paghukom nimo. Nahimo na nako ang Resolution nga dunay gitawag og probable cause for the crime of adultery. Wa pa nako pirmahi. Ug ang Information nga nag-akusar kanilang Maychel ug Ritchie sa maong krimen, nahimo na sab. Nia na ang duha ka papeles ibabaw sa akong lamesa. Pirma nalang nako ang kulang para ma-indorsar na kini sa husgado. Kun mohukom ka nga ipadayon ang kaso, hinugtanay na gyud sa bakus. Trabaho nako nga ipresentar ang tanang ibedinsiya sa krimen hangtud nga mahukman. Ug akong paningkamotan kutob sa akong makaya nga makonbikto sila. Apan sa dili pa na nako buhaton, hatagan tika’g higayon sa pag-atras sa kaso.Kay imo man nang katungod. Apan naa may gitawag og condonation, pagpasaylo sa nakasala,” ni Edwin.

“Pasayloa lang ko Don. Nasayud ka gyud nga gimahal ug gipangga tika. Isip imong asawa, giatiman nako matag adlaw imong mga panginahanglan. Apan daw wa ka man magpakabana sa akong panginahanglan. Kun ang iro mataligam-an sa pagpakaon sa tag-iya, moadto gyud na silingan. Apan mopauli gihapon ang iro sa tag-iya. Ingon ana ko ka-loyal nganha nimo” ni Maychel nga nagtibi. Puno sa pangaliyopo ug pakilooy ang iyang nawong. Daw gikomot ang dughan ni Doning. “Apan dili ka iro! Tawo ka. Busa kun isaad nimo nga palabihon nimo imong tarong paminsar isip tawo, dili palabihon ang kagutom o kauhaw sama sa ubos nga hayop, pasayloon tika” ni Doning. “O, isaad nako” ni Maychel. “Ug kun mosaad si Ritchie nga dili kana niya sungkabon, mapasaylo ko usab siya” ni Doning. “Isaad nako Noy Doning” ni Ritchie. Nakapanghupaw si Edwin. (Kataposan) (Sa magbabasa’g gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)