“Mao kana, Angeline. Wa kami relasyon. Wa man gani ko manguyab niya.”
“Pero maoy pangangkon nga boyfriend ka niya. Ug isip usa ka babaye, dili man tingali buang si Almina nga mangangkon og relasyon nga dili tinuod?”
“Mao kana’y akong gikalibgan kang Almina, Angeline. Kun nganong nangangkon siya nga may relasyon na kami.”
“Tingali’g gika-uwaw mo lang siya maong dili ka gustong mabutyag ngadto sa kadaghanan ang inyong relasyon. Ug kay nanabi man si Almina mao nga dili ka moangkon nga may relasyon kamo?”
“Nasayop ka, Angeline, sa imong pangagpas. Please, tuohi ko.”
Nakahukom si Angeline nga taposon ang panagsulti nila ni Erik. Dili siya interesadong maminaw og kasayoran bahin sa ulitawo ug kang Almina. Alang niya, nonsense ang maong butang.
“Dili na lang nato tas-on ang atong panagsulti, Erik,” giingnan niya ang ulitawo. “I think you don’t owe me an explanation bahin sa relasyon ninyo ni Almina. Dili kana big deal alang nako. May relasyon man kamo o wala, dili ko interesado niana.” -- Sumpayan pa