Ang ka-date ni lolo Delio

Bisan kun may pangidaron na, kay milapas naman sa 60 mahilig lang gihapon si lolo Delio sa paggamit og selpon. Gani duna gayud siya’y kaugalingong selpon nga mahalon pa gani kaayo, kay may video camera man kini.

Ang tumong gud unta ni lolo Delio sa paghupot og selpon aron nga duna siya’y magamit sa pag-interact sa mga tulomanon sa rayo, ilabi na gayud sa mga programang maghisgot og bahin sa politika. Mahilig man gud kaayo siyang mosalmot sa mga isyu nga politikanhon.

Wala sab ko magmahay nga nakahupot og selpon ang akong apohan kay makagamit man usahay ko niini. Mahilig man gud sab ko sa mga “games” sa selpon. Ilabi na sa “Miki’s World.” Makahigayon man ko og duwa sa selpon sa akong apohan, kanang wala siya diha sa balay. Kay ibilin man lang niya ang iyang selpon diha sa iyang kuwarto.

Usa ka higayon niana, atol sa among noon break sa tulonghaan nasigpatan nako ang usa sa akong mga klasmet, nga nagsige og duwa sa iyang selpon. Ang-ang nga lalake ug ang-ang usab nga babaye ang mao nakong klasmet. Ug suod ko kaayo kining higala.

Samtang nagsige ko’g sud-ong sa akong klasmet nga nagduwa sa iyang selpon, kalit lang nga misulod sa akong hunahuna, ang usa ka makapahimuot kaayo nga plano. Nga may kalabutan ang selpon.

Giduol ko dayon ang mao nakong klasmet ug gihagad kun gusto ba siya’g ka-textmate, nga usa ka lalake. Kusog kaayong mingtangdo ang mao nakong klasmet. Ug nangutana gani dayon sa numero sa gusto nakong ipaila-ila kaniya.

Gihatagan ko dayon siya sa numero. Usa ka numero sa selpon ang gihatag ko kaniya. Numero nga sinati ko na kaayo. Kay kanunay ko man kining makit-an, diha sa phonebook sa usa ka selpon.

Sa matag higayon nga wala diha sa balay ang akong apohan, mosulod gyud ako sa iyang kuwarto aron pagsusi sa iyang selpon. Duna man gud koy buot masayran, ilabi na kay misulti man kanako ang akong klasmet nga ang-ang lalake ug ang-ang babaye nga nagsige na sila’g teksanay ug ang lalake nga akong gi-introduce kaniya.

Nahimuot kaayo ko sa dihang akong nabasa ang pipila ka mga mensahe, nga napatik diha sa inbox sa selpon sa akong apohan. Nga nagmatuod nga ang nagpadala sa maong mga mensahe may relasyon na ug siya, si lolo Delio.

Ang nakapahimuot gyud pag-ayo kanako, mao kadtong panagsabot sa duha, alang sa usa ka date. Atol gayud sa Valentine’s Day. Ang giisip nga maoy adlaw sa managhigugmaay.

Atol sa Valentine’s Day, gipanid-an ko lang gyud ang akong apuhang si lolo Delio. Akong namatikdan nga nianang pagka-alas singko gayud sa hapon, naligo kini. Human niini og kaligo, misulod dayon sa iyang kuwarto ug nag-ilis.

Paggawas gayud ni lolo Delio gikan sa iyang kuwarto, isputing na kaayo kini. Mora gayud siya’g usa ka batan-on pa kaayo nga ulitawo. Ilabi na kay ang iyang gisul-ob para usab sa mga batan-on. Ug sa akong tan-aw, mora’g andam na gayud kaayo siya alang sa usa ka date.

Mora hinuon ko’g giabot og kaluoy nagsud-ong kang lolo Delio. Nahimo man gud siyang biktima sa akong kabuang. Apan nahimuot sab kong naghunahuna sa umaabot nga mga panghitabo. Sa higayon unya nga magkakita na sila og ang iyang ika-date. Unsa kahay bation ni lolo Delio, inigkasayod gayud niini nga ang iya diay ika-date dili diay tinuod nga babaye? (Kataposan)