Ang gugma ni Timoy

Minghoy ug huyhoy ang abaga ni Timoy nga mipauli. Saon, gibasura na sad ang iyang gugma kang Mekay. “Kamo gyu’y nakaingon ani ni tatay, nay! Tan-awa wa gihapoy misugot nako,” dihay tuno sa pagmahay ni Timoy ngadto kang nanay niya Pekta.

“Na, ay nalang mi’g mahayi si tatay nimo Benot,” miginhawa’g lawom ang tiguwang. “Saon, mao ra man ni dagway gihatag sa Ginoo nato Dong. Bisan tuod og ang dagway namong tatay nimo Benot mora’g pakapi’s dagkot, apan wa tang kahasol sa ubang tawo.”

“Bisan saon nay, di gyud mada’g retoki ning nawonga,” niya pang misil-ip sa samin nga gisab-it sa ilang haligi. “Nia pay ilong nako, mora’g iti nga nalingkoran. Pun-an pa’s mga mata budlat pa’s nangamatay. Wait pay imo wangsa pa’s tambaloslos. Maay pay gipitlok ko ninyo sa bata pa ko nay.”

Hapit na molapas kaduha sa kalendaryo ang edad ni Timoy, apan hangtud ning pagsuwat, wa pa gyu’y mikubit sa iyang pagpamingwit sa suba sa gugma. Nahinumdom ko sa gipangamoral sa kanahan. Sila si Itay, Pestang, Bosya, Iyakay, Emak, Badang, Petay, ug Baritay.

Daghan pa, apan wa na kong kaila sa uban. Mao lagi wa gyu’y usa. Gikaguol kini’g maayo sa ulitawo. Dihay higayon nga buot nalang niyang hunongon iyang edad. Mikuha siya’g takob sa sardinas, ug gihilhil iyang pulso. Pero wa ihinayon, kay tayaon. Ma-titanus kuno siya.

Bag-ohay lang may lain na sang kaliwat ni Eba iyang giibid-ibiran si Sonia. Sosyal kuno ang dalaga, kay nakaadto’g Manila usa ka semana. Bisan unsay pangayoon ni Sonia ihatag. Karong bag-o selpon na poy gipamarayeg. Mahalon ra ba kinsi mil. Namasin laging makadama aw giprendang kalubihan pero wa na ko mangutana’g kinsay giprendahan.

Pero mao lang gihapon, idlas pa’s nangamatay di pakubil mamanghag si Sonia.

“Kumosta na mong Sonia dong Timoy?,” suna ni noy Benot samtang naghapyud sa hiniktan. “Hanap pa’s dyes panas tay,” nagpanglingo.

“Nanabi pa siya nga kun sugton ko niya mora kuno ko’g nakadaog og lotto ug siya pud kuno mora’g nasunogan.” “Unsa! Hila’s gud niya? Hoy! Timoy! Kalimti tong bayhana. Ikaw ray giutoy adto,” na-hayblad kadiyot ang tiguwang.

“Husto si tatay nimo dong Timoy,” sagbat ni nang Pekta nga mao pay pag-abot gikan nagpa-korte’s buhok ilang Ester Tony. “Wa’y ayo tong bayhana dong. Total na-imyun ka na anang pakyas di ba? Ayaw gukda ang suwerte, paabota kay moabot ra. Mao nay giingong beter lak neks taym.” “Mokiha na lang ko nay, tay,” ni Timoy pa.

“K-kiha? Kinsa kang Sonia?,” misiga ang mabudlatong mata ni nang Pekta. “Dili nay, ang Ginoo, kay anper iyang gihimo. Gibuhat ta niyang pulos bati’g nawong ug wa ko’y kalipay sa gugma, gitamay ug gibiaybiay,” buak ang tingog sa ulitawo sa pinugngang hilak.

“Hoy! Timoy! Ginoo imong ikiha? Wa ka kuyapi! Gabaan baya ka!” ni nang Pekta pang midapog kang Timoy. “Bahala na nay. Di ba duna man kay ig-agaw nga huwes? nangutana siya.

“Oo, si Judge Toria no Pasuborno. Ngano man?” banghag ni nang Pekta.

“Patabang ko nay para ikiha ang Ginoo,” pamugos ni Timoy. “Sus! Pastilan nimong Timoya ka! Sa kiha kinahanglan nga masayran ang tinuod nga pangalan, apilyedo ug adres sa gikiha! Unya nakakita ka sa Ginoo? Nakadumdom ka asa siya magpuyo? Kinsa may imong ipadakop? Bugoo!!!” na-hayblad na gyud si nang Pekta.

“Aw, di diay pwede nay?” napawong ang tinguhang kiha ni Timoy sa Ginoo. “Hoy! Timoy! Sultihan tika, kun mahimo pang ikiha ang Ginoo no, una nang mikiha akong ig-agaw’ng Huwes uy!” niya pa.

Bati sad tingali’g nawong? Kadaghan ba namo diay?” ni Timoy pa sa kaugalingon. (Kataposan)