Mata sa Kasingkasing

Gula 49

“Dili ka na makalimod, Angeline. Klaro kaayo nga gusto ka gyud nga molikay nako. Ngano man, Angeline? Unsay hinungdan nga buot ko nimong likayan?”

“Tungod kay mao kanay gustong mahitabo ni Almina,” laktod nga tubag ni Angeline.

“U-unsa?” Mikunot ang agtang ni Erik.

“Nakigsulti si Almina nako niadtong nakalabay’ng adlaw. Gusto siyang molikay ko nimo. Mao kana’y iyang gihangyo nako.”

“Sa unsa man kuno nga katarongan nga gibaoran ka man niya sa paglikay nako?”

“Tungod kay dili siya gusto nga may laing babaye nga moporma nimo.”

“Unsa?”

“Sa akong analysis, mora’g dako nag katungod si Almina sa imong kinabuhi, Erik. Nagkatrato na man kuno mo?”

“H-ha?”

“Ayaw na lang pagpagoryo-goryo, uy. Nabaniog na sa atong eskuylahan ang maong isyu. Si Almina mismo ang nanabi nga mag-on na kamo.”

Wala makatingog si Erik. Nakita ni Angeline nga gipahit sa ulitawo ang ubos nga wait niini. Unya nagpanglingo kini. -- Sumpayan pa