Gula 4
Samtang gilantaw ni Roel ang baybayon sa unahan, takulahaw lang gibati ni Roel ang usa ka talagsaong kamingaw ngadto kang Myrna. Niini pa lang pag-abot ni Roel sa Giloctog nga sakop sa Barili, daw gihakop sa tumang kamingaw ang iyang kasing-kasing.
“Tana bay Roel. Unsa pa may imong gilantaw diha bay?” gilingi ni Larry ang higala nga nagsigi pa og lantaw sa unahan nga baybayon. Nanglakaw ang managhigala ug gilabang nila ang puthaw nga taytayan tabok sa suba.
Nakahukom si Roel nga bisitahan dayon niya si Myrna. Pag-abot nila niadtong nagsanga nga dalan, gilingi ni Roel kadtong dalan nga paingon sa barangay Hilasgasan, ang barangay nga tua nagpuyo si Myrna.
“Bay Lar, mohangyo ko nimo nga magpauban unta ko sa ilang balay ni Myrna, bisitahan dayon nako siya bay,” giingnan ni Roel si Larry samtang padayon sila nga naglakaw subay niadtong dalan-dalan paingon sa balay sa apohan ni Larry.
Nagngisi si Larry nga milingi sa iyang higala. “Mora’g gimingaw ka g’yud kaayo bay da. Sige mangadto ta dayon sa ilang Myrna. Ato usa nga ihatud kining bag nato sa ilang Lola bay.”
Naglupayat sa kalipay ang mga ig-agaw ug iyaan ni Larry nga nakakita kaniya nga miabot uban ni Roel. “Ayay dia na usab ang amigo nato nga taga siyudad,” abiba sa mga higala ni Roel nga nalipay kaayo sa iyang pag-abot.
Gikihatan ni Roel ang iyang higala nga si Larry. Nakasabot dayon si Larry nga gusto na sa iyang higala nga manglakaw sila paingon sa ila ni Myrna. “Tana bay, para masurpresa si Myrna nga imong gipakalitan og bisita.
Abtik kaayo ang managhigala nga nanglakaw. Mga tulo ka kilometro ang barangay Hilasgasan gikan sa dapit nga gipuy-an sa Lola ni Larry. Igo g’yud sila nga gipaningot dihang miabot sila sa Hilasgasan.
“Kanang balay sa kilid sa bungtod mao kana ang balay ni Myrna bay Roel. Gipatukod kana human sa pagkaminyo niya ug sa Hapon niya nga bana. Ayoha g’yud kay aron maimo na kanang maong balay,” matud ni Larry nga nagkatawa.
Nagbutok-butok ang dughan ni Roel. Wala siya makasabot sa iyang gibati nga naghuna-huna nga sa dili madugay ikakita na usab niya pag-usab si Myrna. (Sumpayan)