Mata sa Kasingkasing

Gula 47

Dili siya angay maguol sa panagrelasyon nila ni Erik ug Almina. Unsaon man nga si Almina man ang nagustohan ug gihigugma ni Erik? Unsaon man nga kutob ra man sa panaghigala ang pagtagad ni Erik kaniya? Wala gyu’y kagawasan ang iyang gugma alang kang Erik!

Dihang may laing tawo nga misulod sa CR, gipahiran pagdali ni Angeline ang iyang mga luha pinaagi sa panyo. Wala siya magpasabot sa babayeng misulod nga naghilak siya.

Wala magdugay ang babaye sulod sa CR. Migawas dayon kini human makatubag sa call of nature. Nahibilin si Angeline sa sulod nga nag-atubang sa dakong salamin tungod sa usa ka lababo.

Nanghilam-os si Angeline. Gihugasan niya’g maayo ang iyang nawong. Unya gisud-ong niya ang iyang panagway atubangan sa salamin human kini katrapohi sa usa ka panyo. Dili na mailhan nga gikan siyang naghilak.

Migawas na si Angeline sa CR. Nakahunahuna siyang moadto sa library. Apan samtang naglakaw siya, nalantawan niya didto sa unahan si Erik. Magkasugat sila. -- Sumpayan pa