CEBU, Philippines - Si Mildred (dili niya tinuod nga ngalan) usa na karon ka gradwado sa kolehiyo bisan ilong-tuwapos siya.
Nakahuman si Mildred, 28, sa kursong business administration gumikan sa iyang bugtong paningkamot.
Wala’y laing tawo nga nitabang kang Mildred sa iyang pagtuon kun dili siya lamang.
Patay na ang iyang mga ginikanan. Namatay sa usa ka aksidente sa dan didto sa Naga.
“Banana-cue ang nagbuhi nako ug nagpatungha hangtud nakaangkon og kurso sa kolehiyo,” matud ni Mildred.
Maayo ang kita niya sa banana-cue tungod kay ang saging nga iyang lutoon gikan ra sad sa yuta nga gibilin sa iyang mga ginikanan diin kasagingan ang tanom.
Duna siya’y tulo ka banana-cue-han diin gitabangan siya sa pagpadagan sa duha niya ka pag-umangkon.
“Pinobre nga negosyo apan ok ra alang kanako,” matud ni Mildred. “Ginganlan ko sa akong mga classmate nga “Banana-cue Queen’ apan ok ra kini kanako. Mao may gihatag sa Ginoo kanako nga paagi aron ako makalingkawas sa pait nga kinabuhi,” matud pa niya.
Dalaga pa si Mildred ug wa pay intensiyon nga magminyo.
Nagplanong mo-apply og trabaho sa pribadong korporasyon apan wala’y intensiyon nga biyaan ang iyang negosyong banana-cue.
“Mahimo tang ingrato sa saging kun biyaan ta negosyong saging nga maoy naghimo nato nga tawo ug nakahabwa sa kalisud,” matud pa ni Mildred. (/JVJ)