Mata sa Kasingkasing
Gula 45
“Bahin nila ni Erik ug Almina.” Laktod nga tubag ni Vera.
“U-unsa? K-kay ngano man diay?”
“Sila na man kuno karon ang mag-on.”
“H-ha?”
“Mao kanay isyu nga mikatap karon sa school campus. Si Almina mismo ang nagpakaylap sa maong balita.”
“D-diay ba? Aw, tinuod tingali kay si Almina man kaha mismo ang nanabi.”
“Mao lagi. Hasta man gani ko gisultihan sab niya.”
“Pareson man sab sila. Guwapo si Erik. Guwapa sab si Almina. Angay gyud sila sa usa’g-usa.”
“Moingon ka lang ana?”
“Unsa man diay ang angay kong isulti?”
“Di ba suod man mo ni Erik?”
“Oo. Ngano man diay?”
“Nakamatikod ka ba nga nanguyab si Erik kang Almina?”
“Ambot lang. Wa ko masayod niana. Aw, nakakita ko nila nga kanunay magkuyog. Pero wa ko magsusi kun unsay real score bahin nila. Managhigala lang mi si Erik. Ug nasayod ko sa akong limitations. Kay ngano man diay?” -- Sumpayan pa
- Latest
- Trending
