Gula 40
Miyango si Salie. Ug niya pa, “siyento porsiyento, Allan. Aduna ako’y solidong kapasikaran sa akong pagtuo. Una, siya ang nasayod nga adunay patay sa bakanteng lote. Ikaduha, wa siya motug-an kanako sa iyang ngalan nagpasabot nga nahadlok siya.”
Miyangoyango si Allan nga miuyon sa panahom sa dalaga. “Posible kanang pangagpas mo. Apan mahimo usab nga nasayop ka sa imong pagtuo.”
“Mikunot ang agtang ni Salie. “Unsay buot mong ipasabot nianang pagkasultiha?”
“Posible nga usa lang siya sa nakasaksi sa pagpatay sa kriminal sa maong babaye ug wala motug-an sa iyang ngalan sa kahadlok nga pahimungtan siya sa mamumuno.”
“Kun mao, sayop ang iyang gihimo, Allan.”
Nahitan-aw si Allan sa dalaga.
“Adunay witness protection program ang kagamhanan alang sa kasegurohan sa kinabuhi sa mga saksi,” mipasabot si Salie. “Kun nakasaksi siya sa nahitabong krimen, ang angay niyang buhaton mao ang pagsaksi sa kaso aron mataral sa hukmanan ang kriminal ug kasilotan.”
“Nahibawo ka na sa panahon ron,” ni Allan pa. “Isig paneguro ang tawo. Isig luwas sa ilang kinabuhi.”
“Mao kana’y nakadaot sa mga tawo. Magpakabuta-bungol lang. Mopiyong ang mga mata sa matuod. Wa’y kooperasyon ngadto sa kagamhanan ug sa mga tinugyanan sa balaod. Mao kana’y hinungdan nga daghan ang mga nahitabong pagpatay nga wala masulbad. Samtang ang mga biktima gikaon na sa wati ilawom sa yuta nagpahimulos ug dakong buhi ang mga kriminal. Sa laktod, wala hatagi’g hustisya ang mga biktima. Kay unsaon, duna unta’y nakasaksi apan mahadlok mobaro’g niini sa husgado.”
“Husto ang giingon ni Inspector Cuyos,” ni Allan pa, “nga dili na safe ang mga babaye karon.” -- Sumpayan pa