Makapa-in Love

Gula 6

Mihukom si Vincent nga mopauli na sila si Lynlyn bisan og nag-uwan pa kay miabot na ang kahaponon. Nagpalit ra siya og payong nga magamit nila pagsalimbong sa kaugalingon nga dili mabasa sa uwan.

Pagkanaug nila sa PUJ atubangan sa Marco Polo Hotel, padayon pa ang uwan mao nga gibukhad ni Vincent ang gipalit niya nga payong. Giagbayan ni Vincent si Lynlyn kay siya man ang nagbitbit sa payong.

Loving sila kaayo tan-awon nga naglakaw subay niadtong gamay’ng dalan-dalan lugsong sa bungtod kilid sa Marco Polo. Mingaw sa balay sa ilang pag-abot. Ang duha ka iro nila ni Vincent ang misugat kanila.

Giyawehan ni Vincent ang pultahan. Misaka sila sa taas ug tagsa-tagsa nga nag-ilis sa ilang sapot nga naumog sa salisi sa uwan. Gitawag ni Vincent ang iyang inahan ginamit ang selpon.

Diha pa mahibaw-i ni Vincent nga milakaw usab diay ang iyang inahan ug miapas na lang sa iyang Papa didto sa gitrabahoan. “Dili pa kami makauli Vincent kay naglunop diri sa downtown area,” matud sa Mama sa ulitawo.

Migawas si Vincent sa kwarto ug mitambo sa balkon. Gilantaw niya ang dakbayan sa Lapulapu nga halos dili pa makita tungod sa pagbunok sa uwan. “Kusoga sa uwan didto sa atbang no?” kalit mitingog si Lynlyn sa iyang luyo.

“Kuyawa nako nimo Lyn,” nagpamikpik si Vincent sa iyang dughan. “Sori kaayo ha?” dali nga tubag sa dalaga.

Gitug-anan ni Vincent si Lynlyn nga dili pa makapauli ang iyang Mama ug Papa kay nagbaha pa didto sa downtown area. Mitan-aw sila og salida sa TV. Wala tuyoa nga dunay romance scene sa salida nga ilang gitan-aw.

Kini maoy nakatukmod ni Vincent sa paggunit sa kamot ni Lynlyn. “I love you Lyn.” Gitutokan ni Lynlyn ang ulitawo apan wala’y tingog nga iyang giluwatan.

Nakapasiplat si Vincent didto sa TV nga naghagkanay ang mga bida sa sugilanon. Takulahaw lang usab nga nagakus ni Vincent si Lynlyn. Wala mopalag si Lynlyn nga gigakus siya sa ulitawo.

“Wala ka ba masuko nga akong gigakus?” ni Vincent pa sa hagawhaw nga tingog. “Kaganina ka ra nga migakus nako dihang nanglakaw ta paingon dinhi nga imo ko nga gipayongan,” nagpahiyom si Lynlyn.

Takulahaw lang nga nagtagbo ang masi’g nila ka mga ngabil ug gitagbaw ang mga kaugalingon sa pagparayganay. “I love You Lyn.” “I love you Vincent.” (Sumpayan)