Medyo ginerbiyos si Gina nga nagdayal sa telepono ning sayong kahapunon. Nia lang siya nigamit og telepono sa tindahan ni Tinang sa baryo Kintolimbo ning dakbayan. Maayo rong orasa kay mingaw ang tindahan. Wa kaayo’y namalit. Unya si Tinang, bisi sa pagsulod og tubig sa plastic aron himoong ice sa ilang freezer.
Tawgon niya si Conrad ang bag-o lang naabogado. Mga wa pay tuig gikan sa pagpasar sa bar exams. Iyang pahalipayan ug paminawon niya kun buhi pa ba ang ilang relasyon. Petsa 7 ron sa bulan sa Pebrero.
Biyuda si Gina. May lima ka anak. Trayenta pa iyang edad pagkabiyuda. Ulitawo si Conrad. Manghod niya’g lima ka tuig. Pag-edad ni Gina og 35, nagkarelasyon sila. Daw MU lang ang nahitabo. Kay gihagad siyang Conrad og tan-aw og sine. Nikuyog siya. Kay bisan niadtong buhi pa iyang bana, duna siya’y kaibog sa ulitawo.
Ug nasabot sab niya ang tinan-awan ni Conrad samtang mag-abot sila sa banyo nga binayran, sa ilang silingan nga si Noy Ponso.
Maligo didto si Conrad nga mag-brief lang. Bisa’g di kaayo siya guwapo macho kaayo og lawas. Way abs. Unya pilit ang tinan-awan ni Conrad niya samtang naligo nga nipis kaayo’g sinina nga humdunon. Puwera buyag, bisa’g lima na iyang anak, maayo man siyang mangareglar sa lawas.
Usa ka gabii, nagkakita sila sa eskina Esmero. Unya gihagad siyang Conrad og panan-aw og sine. Didto wa sila’y nasabtan sa salida. Kay wa dangti’g singko minutos nagkupogay sila.Ug wa dangti’g kinse minutos, nagkasabot sila nga mo-tsek-in na lang.
Naglisod pa gani sa kuwarta adto si Conrad kay self-supporting nga law student pa siya. Nagtrabaho isip legal researcher sa bupete ni Atty. Manuel Andal.
Si Gina nagsalig lang sa pension gikan sa PNP kay pulis man kaniadto iyang bana. Died in line of duty iyang bana nga si Fred. Apan sa kadako sa iyang gastohan sa iyang mga anak ang pension igo lang.
Giabagan niyag negosyo’g ukay-ukay ug bisan unsa na lang nga dry goods nga ikabaligya. Dako’g ikatabang si Conrad sa iyang negosyo. Labi na nga abogado na siya. Nagtampohay pa gani sila sa kaniadto sa motel ug sa pagkaon.
Tungod kay relihiyoso ug istrikto ang mga ginikanan ni Conrad, gihilom nila ilang relasyon sa ilang baryo. Bisan si Conrad, daw sekreto nga gibati’g kaulaw nga nakigrelasyon og biyuda nga dakong pagkamaguwang niya. Maoy nabatyagan ni Gina sa ilang panagkuyogkuyog. Sukad nga naseryoso na si Conrad sa iyang pagtoon ug pag-review sa bar exams, mga lima ka tuig na silang wa magkita.
Ang iya lang tuyo nga mabalik ilang panagsuod. Bisa’g isip higala na lang. Kay dako siya’g ikatabang sa mga paperworks mahitungod sa iyang negosyo.
“Kriinnnggg!” nibagting ang telepono sa pikas linya. Gitoon pag-ayo ni Gina sa iyang walang dunggan. Gihugtan niya’g gunit ang telepono sa walang kamot.
“Hello” matud sa pikas linya. Niginhawa’g lawom si Gina. Daw musika sa iyang dughan ang tingog sa ulitawo.
“Hello, Conrad?” ni Gina nga daw 17-anyos nga dalaga sa kahinam.
“Kinsa ni?” pintok nga tingog sa pikas linya.
“Si Gina ni” niya pa. Daw nahilaw.
“Oy, Gina. Long time” sa pikas linya.
“Congratulations uy! Abogado na man gyud ka. Magkita unta ta. Puwede?” ni Gina daw gikutasan.
“Ehem. Sorry Gin. Bisi na kaayo ko” ni Conrad sa way kinabuhing tono.
“Wa na gyud diay kuwenta nimo atong panagsuod?” ni Gina. Nihangos. Nanglantaw sa halayo.
“Lahi na ko ron Gin. Dako na’g kausaban” ni Conrad.
“Sultihi lang ko’s tinuod. Wa na diay bili ang atong kagahapon?” ni Gina. Gipugngan ang mga luha.
“Pasensiya na Gin. Sa atong relasyon, wa kay angay basolan nako. Maayo ko’g tinagdan nimo. Wa tika dagmali,” ni Conrad.
“Wa diay kay pagbati nako bisan gamay? Sultihi ko’s tinood” ni Gina.
“Nasayod ka nga may pagbati ta sa usa’g-usa. Apan sakitan lang ka kun sultihan tika’s tinuod” ni Conrad.
“Bahala na. Gusto lang kong masayod!” hagit ni Gina.
“Ang tinood Gin, nakatambal ka sa akong sakit. Duna ko’y sakit nga excess of sperm cell. Tambag sa doctor nako nga kinahanglan makig-sex gyud ko kada adlaw. Aron di magsakit akong pus-on kanunay. Kun dili, mag-masturbate. Kun way available nga sex partner. Gihimo lang tikang sex partner,” ni Conrad.
Nabuhian ni Gina ang telepono. Dihang nakaamgo siya nga nia siya’s tindahan. Namahid sa luha. Giuli sa butanganan ang telepono. Nibilin og tibook diyes pesos sa tupad. Nidagan pauli. (Katapusan)