Dear Tita Salie,
Have a nice day and how are you? Just call me Ms. Cancer. Duna ko’y anak apan walay bana.
Duna ko’y hinigugma karon, Tita. Dili pa lang dugay ang among relasyon. Ug dinhi sa akong boyfriend nituyok ang akong problema.
Sa bag-o pa lang ang among relasyon, maayo kaayo siya nako. Kanunay siyang manawag sa celfon, kun dili siya makatawag at least mo-text gyud siya. Unya kausa sa usa ka semana magkita gyod mi. Pero dunay mga higayon nga ako siyang maaway kay kun manawag ko dili man niya tubagon. Pero dali ra sad mawagtang ang akong kasuko kay iya man dayon ko nga pasabton.
Apan karon kalit lang siyang nausab wala ko masayod kun unsay niabot sa iyang kinabuhi nga dili na man siya manawag nako ug wala na siya’y time nako. Ako siyang gisultian bahin niini apan wala moangkon ug matud niya basin kun bisi lang siya. Dihang ako siyang gitawgan kalit niyang giputol ang among estorya kay duna pa kuno siya’y buhaton. Sa akong kalagot ako siyang gibulagan. Apan nakigbalik ra gihapon ko kay dili man nako makaya nga wala na siya. Ug sa among panagbalik misamot man hinuon nga wala siya’y time nako ug nagbuwag na sad mi.
Love kaayo nako siya, Tita, ug duna nay nahitabo namo daghan na ang higayon. Mosugot pa kaha siya kun makigbalik ko niya? Unsay akong buhaton? Palihog pasabta ko. Daghang salamat and God bless. -- Ms. Cancer
* * *
Dear Ms. Cancer,
Please make up your mind ug ayaw pagduwaduwa sa imong mga desisyon. Kun mopakanaog ka og hukom, barogi kana ug ipaglaban. Dili maayo nga modesisyon ka karon apan sa sunod nga adlaw imong bawion. Kun magduwaduwa ka sa imong mga desisyon, hatag bawi ba ang mahitabo duwa-duwaan ka usab ug dili na seryosohon.
Ug nganong makigbalik paman ka niya nga wala naman siya’y time alang kanimo. Gusto nimo nga gahinan ka og oras sa imong uyab ug imong nakita nga dili niya mahatag ang imong gipangayo, pero nganong maghunahuna pa man ka nga makigbalik kaniya? Siya na lang ba ang lalaki nga imong nakita diha sa inyong lugar? Kun dili nimo madawat ang iyang kinaiya ayaw pugsa. Ayaw pugsa pagtulon ang pagkaon kun imo lang kining isuka. Be matured na lang sa imong life, Ms. Cancer.
Tinuod kana nga kun mosulod ka sa gugma dapat andam ka nga masakitan. Apan kun dili na nimo makaya ang kasakit nga dala sa imong gugma ayaw pugsa. -- Tita Salie