Man Hater

Gula 36

“Kaluoy intawon sa maong babaye. Kinsa kaha ang wala’y kasingkasing nga mihimo sa ingon?”

Wala’y tubag.

Miigham si Yuri. Naikag siya pag-ambit sa ilang gisultihan. “Dili na gayod luwas ang mga babaye karong panahona, busa kinahanglang mag-amping ka.” Si Salie ang giingnan niya.

“Kanunay akong nag-amping, Inspector,” matud ni Salie. “Ug mahimo ko ang pagpanalipod sa akong kaugalingon.”

Igo lang mitutok ang inspector kaniya.

Pagkaugma, nagbansiwag sa mga mantalaan ang bahin sa patay’ng lawas sa usa ka babaye nga nakit-an didto sa bakanteng lote. Ang MoonStar Daily ang mantalaan nilang Salie maoy tukib kaayo’g asoy niini. Ug kini nahimong hottest issue nga gisumsoman sa pagsawo-sawo sa mga tabitabi.

Malipayon kaayo si Mr. Pocholo Suarez, ang editor-in-chief sa MoonStar Daily. Tungod sa maong balita nga si Salie Valle maoy nakakuha sa estorya nahimalitan ang ilang mantalaan.

Gipahalipayan sa editor ang dalaga. Gipahalipayan usab si Salie sa iyang mga kauban sa buhatan. Misulbong ang iyang ngalan sa kabantog.

Sa iyang bahin, mapasalamaton si Salie sa tawo nga nanawag kaniya sa telepono nga nagpahibalo kaniya sa nahitabo kang Debbie Balatan, ang babaye nga ilang nakaplagan sa bakanteng lote. Apan nahimong tanghaga alang sa dalaga ang tinuod nga pagkatawo sa maong misteryosong tawo. Usa ka sukna nga wala’y tubag ug nakapalibog kaniya. Wala siya’y ideya kun kinsa ang maong tawo. Wala gani kini motug-an sa ngalan niini ngadto kaniya. Kun nakaila pa lang siya niini, ikapaabot unta niya ngadto sa maong tawo ang iyang kinasingkasing nga pasalamat. Dako kini’g natabang sa pagsaka sa iyang ngalan sa kabantog isip usa ka tigbalita. -- Sumpayan pa