Two Lovely Flowers

Gula 6

Gikupogan dayon ni Renan si Marife. Gipahimuslan nila ang higayon ug gikalimtan nga ilang gibudhian si Clarissa. Milungtad og kapin sa tunga sa oras nga giangkon ni Renan si Marife.

“Unsa kaha’y ikasulti ni Clarissa kun masayod niining atong gihimo Mar. Ikaw man gud gitintal g’yud ko nimo,” giingnan ni Renan ang manghod sa iyang girlfriend. “Nagmahay ka diay sa nahitabo?” ni Marife pa.

Nakahinumdom si Renan nga nagsingabot na man diay ang Valentines Day. Pait kaayo ang iyang gihimo nga bag-o pa gani sila nga nagka-relasyon og ni Clarissa apan iya na kining gibudhian.

Naghinuktok si Renan. Gipunting niya ang iyang mga mata sa kisame sa kwarto sa motel. Nakasabot si Marife nga gimahayan ni Renan ang nahitabo kanila. Nahuwasan na sa iyang nainom ang dalaga.

“Pag-ilis na, ihatud na ko,” giingnan ni Marife si Renan. Miadto si Renan sa comfort room sa motel. Taud-taud mitingog ang selpon sa ulitawo. Nakahuna-huna si Marife nga iyang tubagon nga wala magtan-aw sa screen kun kinsa ang nanawag.

“Hello, kinsa ni?” matud ni Marife. Sa pikas linya nadungog ni Marife ang tingog sa usa ka babaye. “Mamalihog ko ni Renan. Dili ba ikaw kini Marife? Kauban diay mo karon ni Renan?”    

Wala na motingog si Marife, giputol niya ang koneksyon. “Kinsa to ang nanawag?” ni Renan nga migawas sa CR. “Si Clarissa ang nanawag, nakaila siya sa akong tingog,” matud ni Marife.

 Gihatud ni Renan si Marife sa ilang balay apan wala siya magdugay, misirit ra siya’g pauli sa iyang gipuy-an. Diha pa niya masayri nga nagpusot-pusot na diay ang text messages ug missed calls gikan ni Clarissa.

Gi-silent mode diay ni Marife ang selpon ni Renan human niini og tubag mao nga wala na sila makabantay nga mikontak pagbalik si Clarissa. Naglibog si Renan unsaon pagpasabot kay mitug-an diay si Marife nga sila ang nagdeyt.

Natulog na lang si Renan nga wala motubag sa text. Pagkabuntag, nakamata si Renan sa pagsigi’g ring sa iyang selpon. Si Marife ang nanawag nga nagpahibalo nga naghikog si Clarissa.

Wala makatoo si Renan. Nakahilak siya ug nagbakho taman sa iyang gininhawa nga nagmahay. Nahukman ni Renan nga kalimtan na lang usab si Marife nga maoy nakaungkag sa ilang relasyon ni Clarissa.

Mitambong si Renan paglubong ni Clarissa apan nagpalayo ra ug wala magpaila. Dayon milangyaw siya aron paghikalimot sa hitabo. (Kataposan)