Ang utan ni Takyo

Bag-ong abot sila si John ug Fely uban sa ilang bugtong anak lalake nga si Johnfel gikan sa America. Una kining duaw nila sa ginikanan ni Fely sa Sugbo mga napulo na ka tuig sukad sa ilang pagminyo sa America.

Si Fely anak sa magtiayong Takyo ug Minggay nga tag-iya sa kan-anan sa lungsod. Nabantug si Takyo nga maayong moluto sa sud-an labi na gyud sa utan nga lawot higopon ug mao kini ang nakapatungha kang Fely sa kolehiyo nga maestra na sa tunghaang publiko sa lungsod.

Lagi kay may damgo sa kinabuhi, milangyaw ug nanimpalad siya sa America hangtod nga naminyo sa Kano nga si John. Si Fely ra ang anak ni Takyo ug Minggay.....!

Atol nga adlaw’ng natawhan ni Fely pag-abot nila sa lungsod. Imbitado ang tanang mga kauban nga magtutudlo lakip nang mga kawani sa munisipyo sa dakung hikay. Nalipay sab kaayo ang nakadawat sa imbitasyon kay ila nang ikahimamat si Fely ug iyang bana nga Kano ingon man sa iyang anak. Taudtaod nang wa makauli si Fely sa ilang lungsod.

Samtang nangaon ang mga bisita sa hawanan, gikuha ni Fely ang mikropono ug gipaila ang iyang bana nga si John nga nagkalingaw pagtimbaya sa mga bisita. Tapos mobiya sa pundok, mibanus sa mikropono si John ug miingon:

“Mga kababoyan .... khaon kita UTHEN kay lameh. Ang UTHEN ni Thatay Thakyo saksto sa khamenggay. Wow, sharap. Daghan salamat...!”

Nagkayungit si John sa iyang pakigpulong ug slang kaayo ang pinulongan.

Milikoy sab ang iyang panapus: “Dakhan salamat...!” Mingislo ang dagway sa mga bisita nga namati sa pamulong ni John. Si Takyo ug Minggay nga nag-apong sa sud-an ug kan-on nagmug-ot sab ang nawong. Apan kadtong nakaagpas sa buot ipasabot nangatawa kay nahimuot labi na sa milikoy nga panapus nga “dakhan salamat” ni John. Wa lang kalitok...!

Si Fely nga nakamatikod sa reaksyon sa mga bisita, dali nga mipunit sa mikropono ug namahayag nga bag-o pa lang nagtuon si John sa Binisaya. Padayon ang pamatin-aw ni Fely sa pamulong ni John. Sa pulong nga “kababoyan,” kababayan ang pasabot ni John.

“.... kaon kita utan kay lami. Ang utan ni Tatay Takyo sakto sa kamunggay. Wow, sarap! Daghang salamat...!” Gitul-id ni Fely ang pagpasabot sa sakto sa khamenggay:

“Sa kamunggay kana ug dili sa kang nanay Minggay, oyyy!” Nangisug si Fely sa iyang pagpasabot. Nangatawa ang mga bisita ug samot ilang katawa sa dihang gipatin-aw ni Fely ang “dakhan samalat” sa daghang salamat. Si Takyo ug Minggay nga nag-apong sa pagkaon nakasabot sa gipamulong ni Fely igo lang mipahiyum ug dungan nga milamano kang John: “We love you...!” (Katapusan)