Adlaw'ng natawhan

Sa ilang panihapon, wala malilong ni Layla ang mga luha nga nanubod sa mata ni Ramon, iyang bana. Dili na kini niya ikahibulong kun mosunod pagtibi ang baba niini; mohingos, manikma nga mora og gisip-on. Kini ang kasagaran niyang masaksihan kun muabot na ang bisperas sa kasumaran sa adlaw’ng natawhan niini. Moluha dayon ang mata kun dili matuman ang gipangandoy. Luoran na kaayo.

Nagsugod ang iyang kaluoran dihang nag-e     dad na siya’g saysentay otso. Mibalik ang iyang kinaiya’ng binata. Daling magmahay, mahiubos ug himuon dayong daku ang mga butang nga walay hinungdan. Dayon og handom sa iyang kagahapon.

Kaniadto gud sa nagtrabaho pa si Ramon isip assistant treasurer sa munisipyo sa ilang lungsod malipayon kaayo ang pagsaulog sa kasumaran sa iyang adlaw’ng natawhan. Adunay magmanyanita sa kaadlawon ug salusalo sa sayong kagabhion. Walay problema sa preparasyon sa painit sa kaadlawon, inom ug kaon sa panihapon, kay ang tulo niya ka anak pulos na nakatapos sa kolehiyo, may trabaho nga arang-arang og suweldo maoy moabaga sa galastohan sa kasaulogan. Daghan ang mamisita kaniya. Puno ang ilang balay sa iyang mga kauban sa trabaho sa munisipyo ug mga higala sa iyang mga anak. Karon nga meritiro na siya sa iyang trabaho ug nangaminyo na usab ang iyang mga anak nga namalhin na og puyo ngadto sa Canada, Thailand ug Maryland, wala nay usa nga miduol kaniya bisan og mangumusta na lang unta sa iyang kahimtang. Nagmingaw na ang iyang panimalay. Sila na lang duha ni Layla ang magsaulog sa kasumaran sa iyang adlaw’ng natawhan.

Kaadlawon, gipukaw si Ramon sa kalanog sa mga birthday songs nga mitugaw sa kahilom sa nagsingabot nga kabuntagon. May nagmanyanita. Sa iyang pandungog, diha gyud sa tungod sa ilang balay ang nagmanyanita. Mihinayhinay siya pagbangon aron dili makamata si Layla nga nahinanok, mora’g patay kun matulog. Mainampingon nga gipasiga ang mga suga sa koral sa iyang balay ug milili sa bintana aron klarohon ang mga nawong sa mga nagmanyanita pamasin kun kini iya bang mga kuya ug ate sa; PREX (Parish Renewal Experience), Knights of Columbus, Extra-ordinary Eucharistic Minister, ug uban pang kapunongan nga iyang giapilan. Apan wala siya’y nailhan bisa’g usa kay pulos bukobuko sa nagmanyanita ang iyang nakita. Dili siya ang gipahinungdan. Ang tanang nanganta didto mag-atubang sa balay nga atbang sa ilang balay nga giulang lang og kalsada.

Mibalik og higda si Ramon sa kilid ni Layla. Wala na siya makatulog tungod sa talagsaong kalipay nga iyang gibati. Lahi sa nangaging katuigan, wala karon magmingaw ang kasumaran sa iyang adlaw’ng natawhan. Bisan dili siya ang gipahinungdan; ang kasadya ug hudyaka sa iyang silingan, nakatagbaw sa iyang dughan. Natuman ang iyang gipangandoy. Diha sa lawom nga kahimatngon sa matuod niyang kahimtang karon, nakaingon sa kaugalingon: “Dili angay nga hilakan ang kagahapon; dawaton, atubangon ug pahiyoman ang karon.” (Kataposan)