Sulagma nga Deyt

Gula 4

Gipasiga ni Narding ang suga sa kwarto. “Sige diha ka matulog sa kotson nga higdaanan Camel kay ari lang ko mohigda sa sawog. Mubo ra man gud ang sopa og dili kahigdaan,” giingnan ni Narding si Camela.

Wala lang nila pagnga ang lampshade nga diha sa ulohan nga bahin sa higdaanan aron modan-ag kini sa tibuok lawak. Maikog g’yud unta kaayo si Camela kang Narding nga anaa ra mohigda sa sawog, apan dili usab maayo nga tugotan niya kini nga motupad kaniya paghigda.

“Ngano diay nga miingon ka ganina Camel nga milangyaw ka sa Cebu aron paghikalimot sa imong kaagi dinhi sa Davao?” nakapangutana si Narding kay nahinumdom siya sa gisulti sa dalaga kaganina. “Ang akong boyfriend gud mibiya nako pagkasayud niya nga nagmabdos na ko sa kinawat-kawat namo nga paglipay-lipay. Mikalit lang og kahanaw sa iyang gitrabahoan. Wala mahibaw-i kun hain na,” sa dalaga nga nahimong seryoso.

Giam-aman ni Narding ang dalaga nga kalimtan ang mapait niyang kaagi. “Sige katulog na Camel.” Nahilom ang tibook lawak ug nakatulog silang duha.

Apan kalit lang nakamata si Narding dihang nabantayan niya nga si Camel naglingkud sa kama nga nagpanghikap sa iyang tampihak. Nasabtan ni Narding nga gisakitan ang dalaga.

“Naunsa ka Camel?” nakapangutana si Narding sa dayon niyang bangon sa gihigdaan niya nga sawog. “Misakit na usab ang akong ulo Narding,” ni Camel pa nga nagpiyong ang mata.

“Oki ra ba nimo Camel, pisilon nako ang imong ulo. May naantigohan ko niini kay ako man ang tighilot sa akong amahan kaniadto,” matud ni Narding. Wala motingog ang dalaga.

Milingkud si Narding sa kotson ug hinay nga gikuha ang kamot sa dalaga nga nagpislit sa iyang tampihak. Gimasahean niya ang tibuok ulo ni Camel. “Kanindot diay nimo mohilot Narding, suheto ka man diay mohilot,” ni Camela pa.

Gikan sa ulo miaginod ang pagmahasahe ni Narding ngadto sa tangkogo sa dalaga, dayon ngadto sa abaga. Miagulo si Camela nga daw nakagusto sa pagmasahe ni Narding.

“Sus kun dili pa ko maikog kanindot magpamasahe sa tibuok lawas uy. Nindot man diay ka momasahe,” wala makapugong si Camela pagtug-an sa iyang gibati.

“Walay problema Camel, ayaw lang kataha nako,” abtik nga pasabot ni Narding. Gibalikan ni Narding pagmasahe ang ulo sa dalaga apan sa ngadto-ngadto anam-anam

nga mikamang ang pagmasahe niini sa buko-buko sa dalaga.  (Sumpayan)