Mata sa Kasingkasing
Gula 25
Motubag pa unta si Angeline sa gisulti ni Erik pero wala’y mga pulong nga nanglugwa sa iyang baba dihang nakita niya si Almina nga misulod sa canteen. Kalit lang gikulbaan si Angeline dihang miduol si Almina sa nahimutangan nila ni Erik.
“Nia ka ra man diay dinhi, Erik,” nagkanayon si Almina.
Si Erik daw nakugang sa kalit nga pagbutho ni Almina.
“Ingon ka nga mag-CR ka lang,” ni Almina pa ngadto kang Erik. “Wa ka man lagi mobalik didto sa library. Gigutom ko maong mianhi ko sa canteen. Wa ko magdahom nga nia ka ra diay sab dinhi.”
“Pasensiya ka na, Almina,” ni Erik pa. “Gigutom na sab ko maong paggawas nako sa CR, milahos na lang ko dinhi sa canteen.”
“Wa na lang gyud ka mobalik sa library aron pagpahibawo nako ug magkuyog na lang unta ta dinhi,” ni Almina.
“Sorry gyud kaayo,” ni Erik.
Namatikdan ni Angeline nga gitutokan siya ni Almina.
Hait og tinutokan si Almina kang Angeline. Natugkad sa dalaga nga wala kini mahimuot nga nakigsulti si Erik kaniya. -- Sumpayan pa
- Latest
- Trending
