Gisugot sa text

Dear Tita Salie,

Have a wonderful day. Tawga lang ko sa pangan nga Jen, 18 years of age and still single.

Niapil ako sa uso karon nga mao ang text-text lang. Aduna ko’y daghang textmate, Tita. Bahala kun medyo gastos ang importante nga malingaw ko. Aduna man say ubang textmate nga kun imong pangayoan og load mohatag ra sad dayon. Mao kini ang akong gihimong kalingawan, Tita.

Aduna koy usa ka textmate nga nanguyab nako sa text lamang. Ug ako usab siyang gisugot. Kada-text niya moingon gayod siya nga nahigugma siya kanako. Apan tungod kay text lamang dili gayod ko motuo mao nga ako lamang siyang tubagon nga “bot-bot.” Kay para nako dili man gayod seryos kay wala pa man siya makakita nako. Mao nga lisod pa alang kanako nga tuohan ang iyang gisulti sa text. Pero malain ra ba siya, Tita, kun dili ko motuo. Mora siya og mangluod nako.

Tinuod kaha nga nahigugma siya nako, Tita? Palihog pasabta ko sa angay nakong buhaton. Thank you very much and more power.

* * *

Dear Jen,

Naka-admire ko sa imong pagkatawo, Jen. Nalipay ko nga aduna pay tawo nga sama kanimo. Kadaghanan gud karon ilabi na sa atong mga batan-on dali na kaayong patuohon. Bisan sa text lang nag I love you ang usa ka lalaki ila na kining dawaton ug seryosuhon. Kay alang kanila bisan text lamang igo na nga proweba aron tuohan ang usa ka gugma. Ug mao kini ang usa sa mga hinungdan nganong dunay mga nabiktima sa text. Sa text nasulti ang gugma dayon nagkasabot sila nga mag-eye ball. Ug sa dihang nagkita na sila gi-rape ug gipatay si inday. Mao kini ang mahitabo kun dali ra kitang mosalig sa usa ka tawo.

Sakto ang imong gibuhat, Jen. Ayaw usa seryosoha ang iyang gi-offer nga gugma kay wala gayo’y nasayod kun may gugma ang maong tawo ug kun seryoso ba siya.

Busa samtang wala pa nimo makita ug wala pa nimo mapamatud-i nga tinuod ang iyang gi-text ayaw usa siya seryosoha. Ug maoy atimana ang imong pag-eskuyla aron ka mulampos og mamahimong mapasegarbuhon ang imong mga ginikanan ug ang imong mga damgo dunay kalamposan. -- Tita Salie