Gusto makigbulag

Dear Tita Salie,

Hello and hope you are in good health. Tawga lang ko og Capricorn girl, minyo nako ug dunay duha ka anak nga pulos babaye.

Karon wala nay trabaho ang akong bana. Almost a year na siya nga nakatambay lang. Sa una duna siya’y trabaho apan na-terminate tungod sa iyang bisyo. Ug walo nako ka tuig nga nag-antos sa iyang kinaiya. Wala siya’y pagpakabana sa iyang mga anak nga nag-eskuyla na sa elementarya. Wala siya maghunahuna sa mga gastohan namo sa pamilya matag adlaw. Kun mouli siya nga hubog magsige og panghagad nga magbulag kuno mi.

Gikapoy na gayod ko sa akong sitwasyon. Pero bisan pa man niini girespeto lang gihapon nako siya. Kun mag-away mi dili gayod ko magyawyaw sa daghang tawo akong huwaton nga moabot mi sa balay.

Ang akong gusto nga magbuwag mi sa maayong kabubut-on kanang dili hinubog. Kun mo-file ka og annulment pila man kaha ang magasto? Unya kinahanglan ba gayod o mapugos ba gayod siya pagpirma kung mo-file ko, Tita? Mao na kini ang nakab-ot kong hukom. Palihog pasabta ko. Daghang salamat and God bless. More power to your page.

* * *

Hello, Ms. Capricorn girl, ug kumosta ang kinabuhi? Dili lalim ang kinabuhing minyo kun wala’y pagsinabtanay sa mga namuyo sa balay. Apan tam-is ang kaminyoon kun ang magtiayon nagtambayayong alang sa kalamboan sa pamilya ug nagminahalay ang duha nga nanumpa nga ilang puy-an ang kinabuhi diha sulod sa kaminyoon. Kun ang usa’g-usa dunay pagbati sa iyang kapikas sa kinabuhi, kun ang bana nagtan-aw sa kaayohan sa iyang mga anak ug asawa.

Kasagaran ug daghan kaayo ang magtiayon karon nga dagko og problema mahitungod sa ilang pagpuyo. Mao kini ang common problem sa atong society karon family problem–wala’y pagsinabtanay sa asawa ug bana.

Suwayi og hunahuna kun unsay nawala o na-missing sa inyong relasyon. Kun sa una dihang uyab pa mo o bag-o pa kamong minyo nindot ang inyong pagpuyo. Apan samtang nagdagan ang adlaw nag-anam usab og kausab ang inyong pagpuyo. Ngano man unsa may nawagtang? Mao kana ang pangitaa aron mabalik ang inyong gana sa usa’g-usa. Kun nawala ang romance kinahanglan ibalik kana.

Apan common nga hinungdan sa tanan mao ang garbo. Usahay ang away magsugod lamang sa simple nga pangluod ug kahiubos. Apan tungod sa garbo ang maong simple nga luod nidako hangtod mihuot sa dughan diin ang gugma wala nay kabutangan.

Ayaw pagdalidali og bulag. Pag-estorya mong magtiayon kay kuwang mo sa sabot-sabot. Ibalik ang inyong relasyon sama kaniadto. -- Tita Salie