Mata sa Kasingkasing

Gula 23

“Wa koy laing ikabugti sa ilang pagtabang nako nga makaeskuyla gawas sa maayo kong performance sa tulonghaan. Mao nga gusto kong makakuha og mas dagkong grades.”

Wala motingog si Erik. Ingon sa naghinuktok kini sa gisulti ni Angeline. Kun natagbaw man kini sa iyang pagpasabot, wala makaseguro ang dalaga. Ang importante alang niya mao nga nakapadayag siya’g katarongan.

“Ngano man diay, Erik?” Misukit si Angeline. “Dili man tingali ko ingon niana ka importante alang nimo? Duna man kay daghang higala, mga sapian sila sama nimo. Dili sama nako nga kakha-tuka ug dili nimo ikapasigarbo.”

“Nasayop ka, Angeline,” nagkanayon si Erik. “Wa ko magpilig higala, datu man o kabus. Kay alang nako managsama ra tang tanan. Ug importante kaayo ka sa akong kinabuhi!”

Ingon sa misayaw sa kalipay ang kasingkasing ni Angeline sa iyang nadungog gikan kang Erik. Flattered siya sa gisulti niini. Tiaw ba nga gihatagan man diay siya’g bili sa lalaki nga iyang gimahal sa hilom? Kinsa bang babayhana ang dili malipay niini?” -- Sumpayan pa