Minyo diay

Dear Tita Salie,

Good day. I’m Roxie, 26 years old still single pero duna nay anak. Nagpuyo ko kauban sa akong mga ginikanan sa Talisay. Nabuntisan ko sa akong uyab nga bag-ohay lang nako nahibaw-an nga minyo diay siya. Dili man god siya taga dinhi ug kauban ra siya og trabaho sa akong amiga.

May anak na mi dihang akong nahibaw-an ang iyang kahimtang. Ako siyang gibuwagan apan dili siya mosugot. Mitabang hinuon siya sa mga gastohan sa bata.

Ang akong auntie nga tua sa Singapore nga nakahibalo sa akong nahiagoman naluoy siya nako ug gusto niya nga molarga ko adto niya kay iya kong tabangan makatrabaho. Apan dili mosugot ang akong uyab, iya kunong biyaan ang iyang asawa ug kami na ang magtipon. Naglibog nako. Unsa may akong buhaton? Salamat. -- Roxie

* * *

Good day to you, Roxie,

Bisan tuod kun nailad ka sa imong uyab kay minyo man diay ang lalaki apan makaingon ko nga suwerte lang gihapon ka. Swerte ka kay anaa kanay anghel nga makauban kanimo, ang imong anak. Bisan paman nga minyo ang imong uyab apan anaa siya mitabang ug misuporta sa mga gastohan alang sa pagbuhi sa inyong anak. Dili sama sa uban nga igo lang giithan ug dayon gibiyaan sa ilang uyab nga walay kaluoy ug walay batasan.

Laing butang nga imong pasalamatan mao nga ni-offer ang imong auntie og tabang aron mamaayo ang imong kahimtang. Aron usab imong mahatagan ang imong anak og maayong kaugmaon. Mao kini ang mga kahayag nga dapat nimong makita ibabaw sa mangitngit nga kasinatian nga imong nahiagoman. Busa gawas nianang mangitngit nga kinabuhi ug puy-i ang kinabuhi nga karapat dapat kanimo.

Apan kun dako gayod ang imong gugma sa imong uyab tabangi siya nga mobalik sa iyang pamilya, kay sama kanimo dunay kasingkasing ang iyang asawa nga masakitan usab kun kini biyaan sa iyang bana. Ilabi pang masakit kun sila dunay anak kay sila gayod maoy alaot kay dili pa sila makasabot sa mga panghitabo sa kinabuhi.

Bisan man kun nagsuporta sa bata ang imong uyab apan sa kamatuoran nga minyo siya wala ka gayo’y mapaabot kaniya. Kun ikaw ang iyang pilion ug biyaan niya ang iyang pamilya dili ka usab magmalipayon kun imong hunahunaon nga mabungkag sila tungod kanimo. -- Tita Salie