Mata sa Kasingkasing

Gula 21

“Gusto lang kong masayod sa hinungdan, Angeline,” ni Erik pa.

“Sa unsa?”

“Kun nganong ingon sa gusto ka nang molikay nako?”

“U-unsa?”

“Nakamatikod kong mora’g di ka na gustong makigsuod nako. Nahibong ko niini, Angeline. I don’t want to lose our friendship. Ikaw baya ang una nakong nahigala sa first day nako sa college gawas sa karaan na nakong mga amigo.”

Wala motingog si Angeline. Nahinumdom na hinuon siya sa unang adlaw nila sa kolehiyo. Sa iyang klase sa first subject niya sa buntag, si Erik ang gikatupad niya’g lingkoranan. Nag-ila-ila sila. Ug kadto nay sinugdanan sa ilang panagsuod.

“Nganong gusto ka man nga molikay nako karon, Angeline?” pangutana ni Erik.

Naglibog pagtubag si Angeline.

Tinuod ang pangagpas ni Erik nga gusto nang molikay si Angeline niini. Nakatugkad diay ang ulitawo sa iyang mga lihok. Pero nakahukom si Angeline nga dili niya angkunon ang gisulti ni Erik kaniya.

“Dili kana tinuod, Erik,” giingnan niya ang ulitawo. -- Sumpayan pa