Kaslonon

Lola, Mag-wedding man unya mi ni Roy!” matud ni Jane. Mapahiyomon nga nisulti ngadto’s iyang lola Mary. Nahasiga ang mga mata sa apohan sa kahingangha. Nakugang siya samtang nagtan-aw og telenobela sa ilang sala. Samtang si Jane mapahiyomon nga nagpaklipakli og Coloring Book nga naglingkod sa sopa tupad sa apohan.

Nagsugod ang relasyon nilang Jane ug Roy dihang ang mga ginikanan ni Jane niipon og puyo sa mga apohan niya, sa baryo Kuruksetra ning dakbayan. Ang daddy ni Jane nga si Byron, magtutudlo sa Kuruksetra National High School. Ang mommy niya nga si Grace, call center agent sa Eastern Watch.

Si Roy anak sa managtiayong Fe ug Ritche nga tag-iya sa karenderya ug videokehan duol sa balay sa mga apohan ni Jane. Kay nagkasilingan sila, si Jane ug si Roy nagkasuod. Sa panahon nga way klase o way trabaho, kanunay silang magkuyog. Magpulihanay’g sakaysakay sa ilang masigka bisiklita.

Magtupad manan-aw og telebisyon. Kun dili sa TV nilang Roy, sa TV sa lola ni Jane. Manan-aw sila’g basketbol sa basketbolan sa duol. Usahay adto manan-aw sa magduwa og volleyball sa laing playground sa duol. Inseparable silang duha. “The best of friends” matud pa sa nakasaksi sa ilang kasuod. Maghatagay sila’g pagkaon. Maghuwamanay sila’g CD o DVD sa ilang mga paboritong salida.

Accountant ang lolo ni Jane nga si Edward. Dunay Accounting Firm sa ilang baryo. Nag-opisina sa Tibon Realty Development, Inc. isip Chief Accountant. Nagtudlo sab og mga subjects sa kursong Accountancy sa University of San Sebastian. Pinangga ni lolo Edward si Jane. Hasta sab si Roy. Nagkasuod ang duha ka pamilya nilang Jane ug Roy tungod sa ilang relasyon.

School mate sila si Roy ug Jane sa Sacred Word Academy. Hatud kuha sa eskuylahan si Roy sa iyang amahan. Si Jane hatud kuha sab sa iyang lolo.

“Lola. Inig kadako namo, mag-wedding mi ni Roy. Best friend man mi lola,” dugang ni Jane.

“Nahibawo na ang mga daddy ug mommy ni Roy sa inyong plano?’ ni Mary nga nagpahiyom na.

“Wa pa” ni Jane.

“Imong daddy ug mommy, nahibawo na sa inyong plano?” ni Mary. Nanap-ong sa baba. May gipugngan.

“Wa pa sad” ni Jane. “Aw! Pahibaw-a unya sila ninyo,” ni Mary. Ug wa na siya kapugong. Nibahakhak og dako kaayo.

Si Roy siyete anyos ang edad. Nagtungha pa sa grade one. Si Jane, singko ang edad. Naa pa sa kindergarten. Nahimuot kaayo ang apohan sa ka-inosente sa iyang apo. (Katapusan)