Mata sa Kasingkasing
Gula 18
Kun nagdala pa’g pana ang tinan-awan ni Almina kaniya, seguradong natuhog na siya niini.
Nakasabot si Angeline nga wala mahimuot si Almina sa pagduol ni Erik kaniya. Di siya gustong may tawo nga masuko kaniya busa nakahukom siyang mopalayo kang Erik. Dihadiha mitindog siya.
“Asa ka na man?” Nangutana si Erik.
“Biyaan ko una ikaw,” nagkanayon si Angeline. “May adtoon ko sa buhatan sa atong dean.”
“Magsulti una ta.”
“Sa sunod na lang.”
Ug dayon migawas na siya sa library. Mipadayugdog siya’g lakaw palayo sa maong dapit. Apan wala siya moadto sa office sa ilang dean. Milahos siya sa canteen sa tulonghaan.
Gusto lang ni Angeline nga makalikay kang Erik.
Pagsulod ni Angeline sa canteen, mi-order dayon siya’g ice tea. Unya mipahimutang siya’g lingkod atubangan sa bakanteng lamesa.
Samtang nagpunay og suyop sa ice tea pinaagi sa straw, si Erik ang iyang gihunahuna.
Gusto siyang makalikay kang Erik aron dili na molipang ang gibati niyang paghigugma ngadto niini. -- Sumpayan pa
- Latest
- Trending
