Gula 15
Nagtupad ang duha sa pagpanglingkod ug very sweet silang tan-awon sa maong kahimtang. Makapaikag ang ilang sitwasyon.
Naglain ang pagbati ni Angeline sa iyang nakita. Nagselos ba siya? Wa siya makaseguro. Wala siya makasabot sa iyang kaugalingon. Gawas pa, wala siya’y katungod nga magselos. Wala siya’y labot sa kinabuhi ni Erik. Basta kay ingon sa dili siya gustong makakita nila ni Erik ug Almina nga ingon sa malipayon kaayong nagkukabildo. Gilainan siyang nagtan-aw nila nga ingon sa komportable kaayo sa usa’g-usa.
Crush ni Angeline si Erik. Dugay na sukad sa unang adlaw sa ilang pagtungha sa kolehiyo. Sa kadugayan, na-develop gyud ang iyang pagbati ngadto sa paghigugma kang Erik. Pero gitipigan niya ang maong pagbati. Nasayod siyang wala’y katumanan ug wala’y kagawasan ang iyang gugma ngadto kang Erik. Usa ka damgong wala’y katumanan, matud pa.
Alang kang Angeline, taas ra kaayong kab-oton si Erik sa sama kaniya nga anak lang sa kabos nga mga ginikanan. Samtang si Erik nakabaton og mga ginikanan nga inila ug tinamod sa katilingban. -- Sumpayan pa