Wa makonsensiya

Gipaningot ug gikutasan si Atty. Noel Oliodo pag-abot niya sulod sa husgado sa Regional Trial Court, Branch 4, sa ikatulong andana’s Kapitolyo. Gisirhan niya ang pultahan ug nilingkod siya sa bakanteng lingkuranan unang laray sa lingkuranan sa mga audience. Nangita siya ni Atty. Ernie Gacho. Didto siya niuna og adto ganiha sa bupete ni Atty. Gacho, unya ang sekretarya niingon nga may bisita gitambongan ang abogado.

Nakita ni Noel nga si Atty. Gacho ang kasamtangang nangutana sa babaye nga naglingkod sa witness stand. Nilingi si Noel sa walang bongbong ug nakita niya ang wall clock nga nagtug-an nga alas diyes ron sa buntag. Si Atty. Gacho lang ang makatabang sa problema ni Noel.

Bag-o lang pasar sa bar exams, si Noel. Wa pay tuig. Unya nagminyo dayon. Mabdos na ang asawa. Hurot na iyang tinigum. Nagpatidpatid na lang sa lata. Kay di na kaapord sa abangan sa nindot nga opisina duol sa city hall, nibalhin siya sa gamay’ng espasyo sulod sa usa ka karendarya duol sa Kapitolyo. Abi niya og inig pasar niya sa bar exams, abogado na, hayahay na siya. Di man diay. Mangita pa man diay og kliyente. Dimalas lag gamay kay igo lang siyang nigradewet sa abogasya, namatay iyang amo nga abogado. Wa siya kapanunod sa mga kliyente ni Atty. Peter Avila nga retirado gikan sa Register of Deeds. Self-supporting student si Noel samtang nagtrabaho sa bupete ni Atty. Avila isip legal researcher.

Wa man siya’y ganang mangempleyado. Kay niya pa, kun suheto na ko mangayo’g sakyanan, mag-abli ko’g akong kaugalingong  talyer.Hapit na di siya kaabang sa iyang bupete.

Apan giswerte siya gahapon sa hapon. Dunay matrona nga adunahan kaayo og hitsura. Namungingi sa alahas. Singsing, pulseras, kwentas, ariyos. Ug nigilakgilak ang postora. Nagpanotaryo niya og Affidavit of Adverse Claim si Mrs. Virginia Garces. Pagkabasa ni Noel sa ngalan sa babaye, ilado ang maong ngalan. Apan karon lang niya nahimamat sa personal. Nag-snacks si Mrs. Garces sa karenderya ug nakahinumdum nga duna diay siya’y dokumento nga wa niya kapanotaryohi ni Atty. Gacho, iyang retainer. Daghang negosyo sa siyudad sa Bogo si Mrs. Garces. May mga katubhan ug may kaugalingong sugarmill. May mga commercial spaces sa poblasyon ug sa mercado. May mga apartment gipaabangan. Diyakpat kun ma-kliyente niya.

“Amigo mo ni Atty. Ernie Gacho?” sa matrona samtang naglingkod tungod sa lamesa ni Noel nga nagsugod og record sa dokumento. (Wa siya’y sekretarya. Kay way ikasweldo) “O maam” pamakak niya. Kaila siya kay inila ang maong abogado. Makabasa siya sa mga mantalaan ug kakita sa TV sa mga kontrobersiyal nga mga kasong gigunitan niya. Apan dili sila amigo. Wa gani kaila si Atty. Gacho niya. Namakak lang siya aron pagpa-impress. “Kay kun tinood nga amigo mo, ikaw nay akong kuhaong retainer. Bisi na man siya kaayo” sa matrona. “O kaila lagi mi, maam. Amigo pa gyud” ni Noel. Namakak nalang og taman aron makakuha’g tubigtubigan nga kliyente. “Puwes, aron makatoo ko nimo nga amigo mo, dad-a siya ugma sa udto sa Yellow Bell Restaurant. Maniudto ta didto ugma. Ug makig-istorya ko ni Atty. Gacho mahitungod nimo” sa matrona. “Patay!” sa hunahuna ni Noel. “O sige ma’am. Segurado. Dad-on ko siya ngadto” gisakyan nalang niya iyang hambog. Hambogero man gyud kuno ang abogado.

“Good morning, Sir,” ni Noel pagdayong gawas ni Atty. Gacho pagkahuman sa bista. “Good morning. Unsay ato?” ni Ernie. “Ako si Atty. Oliodo, kaila mi ni Mrs. Garces. Duna unta koy ihangyo nimo” dugang niya. “Oy panyero. Panyero na lang. Ayaw na lang pag-Sir. Ikaw na lay handle sa kaso kun may kaso si Mrs. Garces. Bisi na kaayo ko” ni Ernie. Nakapanglab-ok sa laway si Noel. “Kana sir, kun makatoo siya nga amigo ta,” ni Noel. Nag-sir lang gyud kay daw amahan lang si Ernie niya sa pangidaron. “Busa karon makig-amigo ko nimo. Unya giimbitar ta niya’g paniudto sa Yellow Bell” dugang ni Noel. Nakatawa si Ernie. “Sigi. Irekomendar tika. Kay tungod sa akong kabisi, dili na nako matagad iyang mga transaksiyon,” ni Ernie.

Nisaler gyud ang pamakak ni Noel. Wa lang makonsinsiya. Kay wa man niya gamita ang bakak sa pag-ilad og huwes aron pagdaug sa kaso. (Kataposan) (Alang sa gustong mokonsulta’g libre, dad-a ning pahina sa opisina sa tagsulat. Iatol og Sabado sa buntag)